Saxta bank təmsilçilərinə aldanmamaq üçün nə etməliyik? - Mütəxəssisdən AÇIQLAMA
Son vaxtlar vətəndaşlara saxta bank təmsilçiləri adından zənglər gəlir, şəxsi məlumatlar istənilir. Hətta birbaşa olaraq bankın nömrəsi ilə də zənglər edilir.
Maraqlıdır, dələduzluğun qurbanı olmamaq üçün vətəndaşlarımız nələrə diqqət yetirməlidir? Saxta zənglə həqiqi zəngi necə ayırd etmək olar?
Mövzu ilə bağlı Sfera.az-a açıqlama verən Azərbaycan İnternet Forumunun Prezidenti Osman Gündüz bank nümayəndələrinin heç bir halda telefon zəngi vasitəsilə müştəridən şəxsi məlumatları tələb etməməli olduğunu deyib:
“Bütün dünyada bu kimi təhlükələr var. Bu təhlükənin qarşısının alınması üçün ilk növbədə vətəndaş öz təhlükəsizliyinə qayğı göstərməlidir. Bunun üçün elementar təhlükəsizlik qaydaları var. Yəni gələn zənglərə qarşı diqqətli olmaq lazımdır, bilmək lazımdır ki, hansısa bankın nümayəndəsi heç vaxt zəng edib müştəridən kart nömrəsi və digər məlumatları tələb etmir. Eyni zamanda sosial media hesablarına gələn mesajlara qarşı diqqətli olmaq önəmlidir. Bəzən hansısa şirkətin oxşar hesabını yaradıb insanlara aldadıcı mesajlar yollayırlar. Bu fərqi tutmaq üçün ayıq-sayıq olmaq lazımdır. Bu dəqiqə texnologiya o qədər inkişaf edib ki, müəssisənin hətta oxşar telefon nömrəsi ilə zəng edirlər. Bu zənglər internet üzərindən gerçəkləşir”.
Mütəxəssisinin sözlərinə görə, qarşıdakı zaman ərzində yeni təhlükələr meydana çıxacaq:
“Hazırda süni intellekt həlləri çıxdıqdan sonra bu təhlükəsizliklə bağlı məsələlər daha da çətinləşəcək, yeni təhlükələr meydana çıxacaq. Ona görə vətəndaş maksimum diqqətli olmalıdır. Bundan başqa Rəqəmsal İnkişaf Nəqliyyat Nazirliyini yanında Elektron Təhlükəsizlik Xidməti var. Bu xidmətin borcu qeyri dövlət sektoru, yəni vətəndaşların təhlükəsizliyinin qarşısının alınması üçün kömək göstərmək, maaarifləndirmə işi aparmaqdır. Əgər vətəndaş belə bir problemlə qarşılaşarsa, sözügedən quruma məlumat verilməlidir. Lakin onu da qeyd edim ki, Elektron Təhlükəsizlik Xidmətinin fəaliyyəti günün tələbləri səviyyəsində deyil. Bu qurumun resursları gücləndirilməli, işə yeni kadrlar götürülməlidir”.
Əzizə Zeynal