“Bu şəxslərin qorumasını gücləndirmək lazımdır” – Təhlükəsizlik üzrə ekspert
Millət vəkili Fazil Mustafaya qarşı sui-qəsd təşkil edildikdən sonra deputatların şəxsi mühafizəsinin gücləndirilməsi məsələsi aktuallaşıb.
Mövzu ilə bağlı Sfera.az-a açıqlama verən təhlükəsizlik məsələləri üzrə ekspert Elmar Nurəliyev terrorçuların diqqət mərkəzində olan şəxslərin qorunmasının ön plana çəkilməsini təklif edib:
“Nəinki millət vəkilləri, ictimai şəxslər, sahibkarlar, yüksək dövlət vəzifəli məsul şəxslər, qiymətli əşyaların daşınması ilə məşğul olan şəxslərin təhlükəsizlik məsələsi həmişə ön planda olmalıdır. Nəzərə almaq lazmdır ki, bu insanlar terrorçuların həmişə diqqət mərkəzində olur. Onlar hədəf seçdikləri şəxsləri bir müddət izləyir, araşdırırlar və boşluqdan istifadə edərək çirkin niyyətlərini gerçəkləşdirirlər. Düzdür, dünyada soyğunçuluqdan, sui-qəsddən 100 faiz sığortalanmaq kimi bir anlayış yoxdur. Lakin bunun üçün önləyici tədbirlər maksimum dərəcədə görülməlidir”.
Ekspert xaricdəki mühafizə məsələsinin ölkəmizdə də tətbiq edilməsinin zəruriliyindən danışıb:
“Nəzərə almaq lazımdır ki, əlində silah olan bir insanın həyata keçirəcəyi əməlin sonu dəhşətlidir. Ölkəmizdə şəxsi qorunma məsələsi aktual deyil, ancaq xarici təcrübədə ictimai, tanınmış şəxslərin mühafizələri olur. Belə olan halda hansısa sui-qəsddən minimal zərərlə qurtulmaq mümkündür. Təbii olaraq bu qorunmanın təşkili şəxs tərəfindən könüllü təşkil edilir. Bu təcrübə bizdə də tətbiq edilsə, yaxşı olar. Deputat Fazil Mustafaya şəfalar diləyirəm. Düşünürəm ki, tezliklə bu cinayəti törədənlər tapılıb layiqli cəzalarını alacaqlar”.
Əzizə Zeynal