İpoteka kreditləri 3 milyard manatı ötdü
Son bir ildə Azərbaycanda verilən ipoteka kreditlərinin həcmi 600 milyon manat artaraq 3 milyard manatı ötüb.
Sfera.az Mərkəzi Banka istinadən xəbər verir ki, ötən ilin yanvarın sonunda əhalinin ipoteka kreditləri üzrə borcu 2,418 milyard manat idi. Bu ilin fevralın 1-də ipoteka kreditləri üzrə borcun məbləği 3,012 milyard manata yüksəlib.
Bir il ərzində ipoteka kreditlərinin həcmi 25 faiz artıb. Bankların kredit portfelində ipoteka kreditlərinin də payı artır. Bir il əvvəl banklara olan hər 100 manat kredit borcunun 14 manatı ipoteka müqavilələri üzrə idi. Bu il isə ipoteka kreditlərinin payı 15 faizi ötüb. Əhalinin aldığı kreditlərdə isə ipoteka kreditlərinin payı bir qədər azalıb.
Bir il öncə ev təsərrüfatlarının kredit borcu 8,948 milyard manat idi. Bu qədər kreditin 27 faizini ipoteka kreditləri təşkil edirdi. 2023-cü ilin fevralın 1-də ev təsərrüfatlarının kredit borcu 11,407 milyard manata yüksəlib ki, bunun da 26,4 faizi ipoteka kreditləri olub. İpoteka kreditlərinin həcminin sürətlə artması kredit götürmək imkanlarının yaxşılaşması ilə bağlıdır. Əvvəlki illərdən fərqli olaraq son illərdə muzdla çalışanların nominal əməkhaqqında ciddi artım baş verib. Nominal əməkhaqqının xeyli artması ipoteka krediti alınması imkanlarını yaxşılaşdırıb. Bununla bərabər ipoteka kreditləri üzrə borcların vaxtında qaytarılması da bankların bu növ kreditlərə üstünlük verməyə sövq edib. İpoteka kreditlərindəki artıma təsir göstərən digər səbəb İpoteka və Kredit Zəmanət Fondunda vəsaitlərin həcminin artmasıdır. Fond indi əvvəlki illərlə müqayisədə daha çox kredit vermək imkanına sahibdir.
Vasif
