"Terrorçu avtomatla atəş aça-aça gələndə polisin müqaviməti ilə üzləşmədi".

Sfera.az xəbər verir ki, bunu Azərbaycanın İrandakı səfirliyinə silahlı hücum zamanı yaralanan mühafizə xidmətinin əməkdaşı Mahir İmanov deyib.

“Polis hadisəyə müdaxilə etmirdi, radio vasitəsilə də məlumat verilmədi. Gördüm ki, silahla bir şəxs qapıya doğru gəlir. Bir addım irəli gələn kimi atəş açmağa başladı. Orxan Əsgərovla mühafizə postuna daxil olduq. Müqavimət göstəmək üçün nəsə götürməyə çalışdıq. Hiss etdim ki, Orxan sağ tərəfə yıxıldı. Döndüm arxaya ki, Vasif onun üzərinə atılıb. Vasifə kömək istəməyə getdim. Sol ayağımdan güllə yarası aldığımdan alınmadı. Mühafizə yoldaşımız Vasif hərəkət etməsəydi, orada faciə yaşanacaqdı. Çünki orada səfirliklə yanaşı, yaşayış binası var idi. 6 ailə orada yaşayırdı”, - deyə M.İmanov ilk dəfə səfirliyə hücumdan danışıb.

O, daha sonra əlavə edib: “Qolumdan 3 güllə yarası aldım. Güllə sol ayağıma dəydi, sağ ayağımı sıyırdı. Tibbi yardım gəldi. Lakin heç bir ilkin yardım göstərilmədi. Yolda eşitdik ki, xəstəxanaya dedilər ki, yaralı gətiririk. Xəstəxanadan deyildi ki, qəbul edə bilmərik .Biz artıq yolu yarı etmişdik. Məni qəbul etsələr də, əməliyyata 5 saatdan sonra aldılar”.

Xatırladaq ki, yanvarın 27-də Bakı vaxtı ilə səhər saat 8:30 radələrində Azərbaycan Respublikasının İran İslam Respublikasındakı səfirliyinə silahlı hücum olub. Məlumata görə, hücum edən şəxs "Kalaşnikov" markalı avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar. Terror aktını törədən İran vətəndaşı Yasin Hüseynzadə saxlanılıb.(modern.az)