Bugünkü növbə ilə bağlı - TƏBİB-dən açıqlama
Bu gün Bakıda 5 saylı Şəhər Kliniki Xəstəxanasının qarşısında uzun növbə yaranıb. Növbədə dayanan şəxslər icbari tibbi sığorta xətti ilə xəstəxanaya üz tutanlar olub.
Sfera.az xəbər verir ki, Məsələ ilə bağlı “Qafqazinfo”nun sorğusuna cavab olaraq bildirilib ki, çəkiliş aparılan müddət ərzində Nərimanov Tibb Mərkəzinə 1541 ambulator, 44 stasionar olmaqla, ümumilikdə 1585 müraciət daxil olub. Həmin xəstələr 6000-dən çox xidmətdən yararlanıblar. Bu xidmətlərə ixtisaslı həkim müayinəsi, ultrasəs müayinəsi, laborator analizlər və sair kimi xidmətlər daxildir:
“İcbari tibbi sığortanın tətbiqi ilə daha öncə vətəndaşlar ilk növbədə sahə həkiminə müraciət etməli idilər, onun göndərişi əsasında isə ixtisaslı həkimlərə yönləndirilirdilər. Hazırda isə vətəndaşların xidmətlərə əlçatanlığı öz həllini tapsın deyə onlar birbaşa ixtisaslı həkimə müraciət edə bilirlər, artıq ailə həkiminə müraciət zərurəti yoxdur. İxtisaslı həkimdən yardım üçün çoxsaylı birbaşa müraciətlər var. Bunların əsasında da instrumental-laboratar müayinələr artır. Bu da bəzi xəstəxanalarda kifayət qədər çox növbə yaranmasına səbəb olur”.
Qurumdan o da bildirilib ki, bunu tənzimləmək üçün gələcəkdə müxtəlif addımların atılması müzakirə olunur.
“Məsələn, “e-tabib” tətbiqi vasitəsilə randevu almaq, onlayn şəkildə qeydiyyata alınmağın mümkünlüyü bu növbələrin qarşısını almağa kömək edə bilər.
Vətəndaşlarımız birbaşa ixtisaslı həkimlərə müraciət etmək əvəzinə, həmçinin növbələrdən xilas olmaq üçün poliklinikalar üzrə təhkim olunmuş ailə həkimlərinin qəbulunda ola bilərlər. Ailə həkimləri onların sağlamlıqları ilə bağlı problemləri düzgün şəkildə müəyyənləşdirərək ixtisaslı həkimlərə göndərəcəklər ki, bu da həmin şəxslərin vaxtlarına da qənaət edəcək. Ailə həkiminin təyinatı olmadan xəstə sağlamlıq vəziyyətini düzgün qiymətləndirməyə bilər. Məsələn, baş ağrısı səbəbi ilə terapevt qəbuluna gedəcək, amma əslində nevropatoloq qəbuluna getməlidir”.
