Polis ötən ay itkin düşən şəxsi axtarır - FOTO

Daxili İşlər Nazirliyi (DİN) Ucarda 24 gün əvvəl itkin düşən şəxsin axtarışı barədə növbəti məlumat yayıb.

DİN-in mətbuat xidmətindən Sfera.az-a verilən xəbərə görə, 2022-ci ilin dekabr ayının 24-də Zərdab rayonunun Çallı kəndində qeydiyyatda olmaqla müvəqqəti olaraq Ucar rayonunda yaşayan Səlyəddin Vahidovun ailə üzvləri Ucar Rayon Polis Şöbəsinə müraciət edərək sonuncunun bir gün əvvəl itkin düşməsi barədə məlumat veriblər.

S.Vahidovun əlamətləri belədir: boyu 175 sm., qısa qara saçlı (yan tərəfləri ağarmış), arıq bədən quruluşludur.

Şəkildə gördüyünüz şəxsi tanıyanlardan DİN-in "102" xidmətinə və Ucar Rayon Polis Şöbəsinə məlumat vermələri xahiş olunur.

Qeyd edək ki, dekabrın 23-də gecə saatlarında yol polisi əməkdaşları hərəkətdə olan və üzərində dövlət qeydiyyat nişanı olmayan "İJ" markalı nəqliyyat vasitəsinə saxla işarəsi veriblər. Bu zaman sükan arxasında olan Zərdab rayonunda qeydiyyatda olan və Ucar rayonunda yaşayan Səlyəddin Vahidov sənəd təqdim etmək adı ilə nəqliyyat vasitəsini kənara çəkərək yaxınlıqdakı fermaya qaçıb. Nəqliyyat vasitəsi götürülərək aidiyyatı üzrə təhvil verilib.

Bir gün sonra S.Vahidovun yaxınları onun itkin düşməsi ilə bağlı rayon polis şöbəsinə müraciət ediblər. S. Vahidovun tapılması istiqamətində axtarışlar davam edir.