Çin ölkəyə gələnlər üçün karantin öhdəliyini ləğv etdi
Çin Milli Səhiyyə Komissiyası yanvarın 8-dən etibarən ölkəyə gələnlər üçün karantin öhdəliyinin ləğv ediləcəyini açıqlayıb.
Sfera.az bildirir ki, qərar Asiya birjaları tərəfindən müsbət qarşılanıb. Yeni qaydalar çərçivəsində COVİD-19 “A sinfi yoluxucu xəstəliklər” siyahısından çıxarılaraq “B sinfi”nə əlavə edilib. Xəbər yayılandan yarım saat sonra sərhədyanı axtarışların sayı 10 dəfə artıb. Eyni zamanda 15 dəqiqə ərzində beynəlxalq uçuş axtarışları yeddi dəfə artıb, siyahıda əsasənTayland, Yaponiya və Cənubi Koreya yer alıb.
Çinin “Sıfır Kovid” siyasətindən imtina etməsi hansı dəyişikliklərə səbəb olacaq?
Bununla bağlı fikirlərini bölüşən iqtisadçı-deputat Vüqar Bayramov vurğulayıb ki, artıq səfərdən 48 saat öncə neqativ koronavirus test nəticəsi olan xaricilər heç bir əlavə tələb olmadan Çinə səfər edə biləcəklər.
“Çinin bu addımı bir tərəfdən strateji məhsullara, o cümlədən neftə olan tələbin artmasına səbəb olmaqla 2023-cü ildə qlobal iqtisadi artımı stimullaşdıracaq. Bu isə qlobal iqtisadiyyat üçün xoş xəbər hesab olunur. Çin ilə Azərbaycanın əsas ticarət tərəfdaşlarından hesab olunur. Ötən il ticarət dövriyyəmiz 1.7 milyard dollardan çox olub. Bu isə o deməkdir ki, Çində sərt karantin qaydalarının aradan qaldırılması Azərbaycan vətəndaşlarının, xüsusən də sahibkarların da səfərlərinə təsirsiz ötüşməyəcək”, deyə V.Bayramov əlavə edib.
Qeyd edək ki, Çinin lideri Si Cinpinin yaxın vaxtlara qədər müdafiə etdiyi “Sıfır Kovid” siyasəti insanların həyatını məhdudlaşdırdığı və iqtisadiyyata zərər verdiyi üçün tənqid edilirdi.
Günay Rəsulqızı