Ukrayna lideri Zelenskinin ABŞ-a gizli səfərinin detalları bəlli olub.

Sfera.az Amerika mətbuatına istinadən bildirir ki, ölkə başçısının təhlükəsiz şəkildə Vaşinqtona çatmasını təmin etmək üçün NATO-nun casus və ABŞ döyüş təyyarələrindən istifadə edilib. Məlumata görə, son ana qədər açıqlanmayan səfər Polşanın Rzesov şəhərində başlayıb.

Ukrayna liderini Avropadan ABŞ-a yola salmaq üçün dünən saat 08:15-də ABŞ-ın “Boeing C-40” hərbi-nəqliyyat təyyarəsi havaya qalxıb. Bundan bir saat əvvəl Almaniya Zelenskinin Rusiya sualtı qayıqlarının gəzdiyi təhlükəli geniş Şimal dənizinə asanlıqla keçməsi üçün “Boeing AWACS” casus təyyarəsini göndərib.

Zelenskinin təyyarəsi İngiltərə üzərindən keçərkən ABŞ Hərbi Hava Qüvvələrinə məxsus F-15 qırıcısı Böyük Britaniya aviabazasından havaya qalxaraq Ukrayna liderinin uçuşunu müşayiət edib. F-15 qırıcısı Zelenskinin təyyarəsi Şotlandiyadan keçdikdən az sonra Suffolk ştatının Mildenhalldakı bazasına qayıdıb. Minlərlə insan Ukrayna liderinin Polşadan ABŞ-a uçuşunun ən azı bir hissəsini onlayn izləyib.

Təyyarə qısa müddət ərzində Berlin səmasında, daha sonra isə Qrenlandiya sahillərində müşahidə edilib. Zelenskini daşıyan təyyarə saat 20.00 radələrində paytaxt Vaşinqtondakı “Joint Base Andrews” Hərbi Hava Limanına eniş edib.

Günay Rəsulqızı