Rusiyanın 11 şəhərinə uçuşlara qoyulan məhdudiyyət dekabrın 27-dək uzadılıb.

Sfera.az Rusiya mediasına istinadən xəbər verir ki, Federal Hava Nəqliyyatı Agentliyi (FHNA) cənub və mərkəzi bölgələrdəki 11 hava limanında uçuşlara müvəqqəti məhdudiyyətlər rejimini uzatdığını açıqlayıb.

Qadağa dekabrın 27-si Moskva vaxtı ilə saat 3:45-dək qüvvədə olacaq.

Məhdudiyyətin uzadıldığı şəhərlər Anapa, Belqorod, Bryansk, Voronej, Gelendjik, Krasnodar, Kursk, Lipetsk, Rostov-na-Donu, Simferopol və Elistadır. FHNA alternativ hava limanlarından istifadə edilməsini tövsiyə edir. Alternativ hava limanları kimi Soçi, Volqoqrad, Mineralnıye Vodı, Stavropol və Moskva təklif olunur.

Qeyd edək ki, uçuşların müvəqqəti məhdudlaşdırılması rejimi fevralın 24-də Rusiyanın Ukraynadakı hərbi əməliyyatı fonunda tətbiq edilib.

Vasif

Sfera.az