"Dekabrın 8-9-da İstanbulda keçirilən Rusiya-Türkiyə məsləhətləşmələri  məhsuldar olub".

Sfera.az xəbər verir ki, bunu  Rusiya xarici işlər nazirinin müavini Sergey Verşinin "Rossiya-24" televiziyasına bildirib.

Verşinin sözlərinə görə, o, Türkiyəyə səfəri zamanı Qara dəniz taxıl təşəbbüsünə nəzarət üzrə İstanbulda yerləşən Birgə Koordinasiya Şurasında da olub. “Mən orada işləyən nümayəndə heyətləri, ilk növbədə BMT, Türkiyə və Rusiya rəsmiləri ilə görüşdüm”, - o vurğulayıb.

Rusiyalı diplomat qeyd edib ki, Rusiya komandası yoxlamaların taxıl müqaviləsi çərçivəsində dəniz humanitar dəhlizinin düzgün işləməsinə zəmanət verməsi üçün böyük iş görür.

Xatırladaq ki, iyulun 22-də BMT-nin himayəsi altında İstanbulda Ukrayna, Türkiyə və Rusiya Ukrayna taxılının Qara dəniz vasitəsilə təhlükəsiz ixracının bərpasına dair saziş imzalayıblar. Bu sənəd Ukraynanın kənd təsərrüfatı məhsullarının üç Ukrayna limanından daşınması üçün humanitar dəhlizin yaradılmasını nəzərdə tutur ki, bu da öz növbəsində qlobal ərzaq böhranının qarşısının alınmasına təsir etməlidir.

Əzizə