Rusiya 2023-cü ildə böyük hücuma hazırlaşır.

Sfera.az bildirir ki, bu barədə “The Guardian” qəzeti iddia irəli sürüb. Nəşr Ukraynanın yüksək rütbəli rəsmilərinə istinad edib. Məlumata görə, son aylarda Rusiyanın döyüş meydanında uğursuzluqlarına baxmayaraq, yeni hücum gözlənilir. 

Ukraynanın müdafiə naziri Oleksi Reznikov da “The Guardian”a müsahibəsində deyib ki, Ukrayna indi özünü Rusiyanın əsas infrastrukturu, o cümlədən enerji şəbəkəsini hədəf alan raket hücumlarından uğurla müdafiə edə bilsə də, Kremlin genişmiqyaslı yeni hücuma hazırlaşdığına dair sübutlar ortaya çıxıb.

Reznikov yeni hücumun fevral ayına qədər baş verə biləcəyini söyləsə də, digər yüksək vəzifəli məmurlar bunun yanvarda olacağını bildiriblər. Rusiyanın 300 minə yaxın əsgəri qismən səfərbər etməsinə toxunan Reznikov fikrini bu cür davam etdirib:

“Minimal təlim aldıqdan sonra onların yarısından qüvvələri gücləndirmək üçün istifadə edildiyi halda, qalanları gələcək hücumlar üçün daha hərtərəfli hazırlanır. Belə ki, təxminən 150 min nəfər müxtəlif düşərgələrdə təlim kurslarına başlayıb. Çağırışçılar hazırlanmaq üçün minimum üç ay vaxt sərf edirlər. Bu o deməkdir ki, onlar növbəti hücum dalğasına keçən il olduğu kimi, yəqin ki, fevralda başlamağa çalışırlar. Rusiyanın planı belədir”.

Ukraynanın müdafiə naziri  həmçinin Rusiyanın yenidən öz vətəndaşlarını səfərbər etməyə davam edəcəyini söyləyib. 

Günay Rəsulqızı