Şimali Koreya ABŞ-a hücum etmək qabiliyyətini xeyli gücləndirib.

Sfera.az bildirir ki, bu barədə ABŞ Konqresinin Tədqiqat Xidmətinin (CRS) ekspertlər qrupu hesabat dərc edib. Qeyd olunub ki,  Vaşinqton Şimali Koreyanın müxtəlif diapazonlu raketlərin sınaqlarının sayının artması, eləcə də digər silahların inkişafı və təkmilləşdirilməsindən son dərəcə narahatdır.

 “Pxenyan son bir ildə raket arsenalını əhəmiyyətli dərəcədə artıraraq, ABŞ-a hücum etmək qabiliyyətini artırıb. Şimali Koreya yeni silah növləri hazırlayıb, köhnələrini isə modernləşdirib. İndi isə Pxenyan uzaqmənzilli nüvə raketlərini buraxmaq imkanına malikdir. Bu ölkə balistik raketlərə quraşdırılacaq qədər kiçik “miniatür” nüvə başlığı hazırlamağa nail olub”, deyə hesabatda bildirilib. “CRS”nin məlumatında ABŞ-ın təhlükəsizliyinə yeni təhdidlər arasında Pxenyanın artan kiber imkanları və ondan qisas, casusluq və iqtisadi qazanc üçün istifadə etməsi də vurğulanıb.

Qeyd edək ki, 2022-ci ildə Şimali Koreya müxtəlif diapazonlu və tutumlu ballistik raketlərin 60-a yaxın sınağını keçirib. Bu il 2017-ci ildən bəri ilk dəfə olaraq qitələrarası ballistik raketlərin sınaqları reallaşıb.

Günay Rəsulqızı