Son iki ildə Azərbaycanda proqramlaşdırmanı öyrənənlərin sayı sürətlə artıb.

Sfera.az xəbər verir ki, bunu iqtisadçı-ekspert Fərid Mehralızadə bildirib.

F.Mehralızadə qeyd edib ki, proqramlaşdırma dillərinə marağın artmasını rəsmi statistikadan görmək olar: “Dövlət Statistika Komitəsi hər il ölkədə informasiya-kommunikasiya texnologiyalarından istifadə bacarıqlarını ölçür. Qurumun ölçdüyü bacarıqlardan biri proqramlaşdırma dillərindən istifadə ilə bağlıdır. Açıqlanan rəqəmlərdən aydın olur ki, son iki ildə Azərbaycanda proqramlaşdırma öyrənənlərin sayı ciddi artıb. Belə ki, 2019-cu ildə ölkədə 15-24 yaşlı gənclərin 1,1 faizi proqramlaşdırma dillərindən istifadə edə bilirdi. 2020-ci ildə həmin rəqəm 2,3 faizə yüksəlib. 2021-ci ildə isə 4,1 faiz olub. Yəni, iki il ərzində az qala 4 dəfə artıb! Son 5 ildə 15-24 yaşlı gənclər arasında proqramlaşdırma dilindən istifadə etməklə kompüter proqramının yazılması bacarığı olanlar isə belədir: 2021 - 4.1%, 2020 - 2.3%, 2019 - 1.1%, 2018 – 1%, 2017 – 0.9%”.

Ekspert dedi ki, gənclərlə yanaşı, ümumi əhali arasında da, proqramlaşdırma dillərini bilənlərin sayı artıb. O 15 yaşdan yuxarı bütün əhali arasında proqramlaşdırma dilləri bilənlərin göstəricisinin 2019-cu ildə 1 faiz olduğu halda 2021-ci ildə 3,5 faizə yüksəldiyini vurğulayıb. F.Mehralızadə qeyd edib ki, bununla bağlı göstərici OECD (İqtisadi Əməkdaşlıq və İnkişaf Təşkilatı) ölkələrində ortalama 6,6 faizə bərabərdir.

Vasif

Sfera.az