“Yaxın aylarda İranın Rusiyaya hərbi dəstəyi artacaq. Tehran Ukraynanı hədəfə almaq üçün Moskvaya yüzlərlə ballistik raket satmağı düşünür”.

Sfera.az UNİAN-a istinadən xəbər verir ki, bunu ABŞ Milli Təhlükəsizlik Şurasının Ağ Evdəki strateji kommunikasiyalar üzrə koordinatoru Con Kirbi deyib.

Kirbi “Amerikanın səsi”nə açıqlamasında söyləyib ki, ABŞ Rusiya-İran əməkdaşlığını zəiflətmək üçün təmas qrupu yaratmağı planlaşdırır:

"Biz gözləyirik ki, İranın Rusiya ordusuna dəstəyi yaxın aylarda artacaq. Hətta İran Rusiyaya yüzlərlə ballistik raket satmağı düşünür. Bundan başqa Rusiyada kamikadze dronların birgə istehsalının təşkili də nəzərdən keçirilir. Biz İranı kursunu dəyişməyə və bu hərəkətlərə əl atmamağa çağırırıq”.

Kirbi deyib ki, Moskva da öz növbəsində Tehrana yüksək səviyyədə hərbi və texniki dəstək verir:

“Rusiya İranı qabaqcıl hərbi texnika ilə təmin etmək niyyətindədir. Siyahıya hava hücumundan müdafiə sistemləri və helikopterlər daxil ola bilər. Yazda iranlı pilotların Rusiyada “Su-35”də təlim keçdiyi barədə də məlumatlar var. Bu qırıcıların Tehrana təhvil verilməsi gələn il ərzində gözlənilir və onlar İranın aviasiyasını regional qonşuları ilə müqayisədə xeyli gücləndirəcək. Ağ Ev hesab edir ki, iki ölkə arasında əməkdaşlıq təkcə Ukrayna üçün deyil, həm də İranın qonşuları üçün təhlükəlidir”.

UNİAN xatırladır ki, bundan əvvəl Ağ Evin digər rəsmisi Rusiyanın pilotsuz təyyarələr müqabilində İranı ən son silahlarla təchiz etdiyini bildirmişdi.

Vasif

Sfera.az