Türkiyə prezidenti Rəcəb Tayyib Ərdoğan dekabrın 11-də rusiyalı həmkarı Vladimir Putinlə telefon danışığı planlaşdırdığını bildirib. O, həmçinin Ukrayna prezidenti Vladimir Zelenski ilə də danışmaq niyyətindədir.

Sfera.az bildirir ki, bu barədə Türkiyənin “Anadolu” xəbər agentliyi məlumat yayıb.

Ərdoğan qeyd edib ki, Putinlə söhbətin mövzusu taxıl dəhlizi olacaq. Lakin o, Zelenski ilə nə barədə danışacağını hələ dəqiqləşdirməyib.

Türkiyə prezidenti həmçinin bildirib ki, Türkiyənin Ukraynadakı müharibəni dayandırmaq üçün diplomatik səyləri ona yönəlib ki, müharibədə qalib, sülhdə isə məğlub tərəf ola bilməz.

Onun sözlərinə görə, Rusiya-Ukrayna müharibəsi bütün dünyaya ciddi siyasi, humanitar və iqtisadi ziyan vurub. Rəcəb Tayyib Ərdoğan əlavə edib ki, o, Ukraynanın ərazi bütövlüyünü dəstəkləyir.

“Eyni zamanda, biz Rusiyanın ağılasığmaz siyasət vasitəsilə regionda ziddiyyətlərin qızışdırılmasına qarşı çıxmışıq”- deyə o bildirib.

Türkiyə prezidenti Rusiya və Ukrayna prezidentləri ilə çoxsaylı danışıqları barədə də danışıb. O, Ankaranın bütün səylərinin Qara dəniz regionunda sülhün əldə olunmasına yönəldiyini vurğulayıb.

"Rusiya ilə Ukrayna arasında İstanbul dialoq prosesinin kəsilməsinə baxmayaraq, bu platforma hələ də uzunmüddətli sülh üçün ən ideal platforma olaraq qalır"- deyə Ərdoğan bildirib.

Xatırladaq ki, Vladimir Zelenski Ukraynada sülh prosesinin yeni ildən tez gələ biləcəyini qeyd edib. Zelenski ölkədə sabitliyin qorunmasına və milyonlarla insanın müharibədən sağ çıxmasına kömək edən Avropadakı bütün müttəfiqlərə təşəkkür edib.

Dekabrın 7-də isə Vladimir Putin Ukraynada müharibənin uzun sürən prosesə çevrilə biləcəyini qeyd edib. O hesab edir ki, işğalın əsas nəticəsi Ukrayna ərazilərinin və hazırda ruslarla birlikdə yaşayan insanların ilhaqı olmalıdır.

Aynil