“Putinlə müntəzəm müzakirələr aparıram” - Makron
Fransa prezidenti Emmanuel Makron Rusiya lideri Vladimir Putinlə birbaşa əlaqə saxlayır.
Sfera.az bildirir ki, bu barədə Makron “CBS” telekanalının jurnalistlərinə müsahibəsində söyləyib. O qeyd edib ki, belə bir vəziyyətdə təcrid etmək ən pis seçimdir:
“Putinlə müntəzəm müzakirələr aparıram. Hesab edirəm ki, qarşılıqlı əlaqəni bərpa etməyin ən yaxşı yolu birbaşa ünsiyyət kanalını saxlamaqdır”.
Ukraynadakı münaqişənin sonunu necə gördüyü ilə bağlı sualı cavablandıran Makron “Ukraynalılar bununla bağlı qərar verməlidir”, - deyə bildirib.
"Bu vəziyyətdən yeganə çıxış yolu danışıqlardır. Mən heç bir hərbi variant görmürəm", - Fransa lideri vurğulayıb.
“Rusiya və Ukrayna nümayəndələri ilə qeyri-rəsmi danışıqlar aparılırmı?” sualını isə Makron belə cavablandırıb: "Mən heç vaxt qeyri-rəsmi proseslərdə iştirak etmirəm. Həmişə öz işlərim barədə məlumat verirəm. Hər dəfə prezident Putinlə danışanda bunu ictimaiyyətə açıqlayırdım". O, əlavə edib ki, Ukrayna prezidenti Vladimir Zelenski ilə münasibətdə də oxşar mövqe tutur.
Xatırladaq ki, şənbə günü Fransa lideri ABŞ-a dövlət səfərindən sonra “TF1”ə verdiyi müsahibədə yaxın gələcəkdə Putinlə telefon danışığının baş tuta biləcəyini təsdiqləyib. Makronun sözlərinə görə, o, digər məsələlərlə yanaşı, Zaporojye atom elektrik stansiyası ətrafındakı vəziyyətə də toxunmaq niyyətindədir.
Günay Rəsulqızı
