Rusiya çarəsiz durumda, çıxış yolunu “İBLİSDƏ” tapanlar – Putin, Medvedev, Kadırov...
“Ukraynadakı hərbi məğlubiyyətlə yanaşı, Rusiyada cəhalət də sürətlə yayılır”.
Sfera.az bildirir ki, bunu politoloq Ərəstun Oruclu ötən gün Rusiya Təhlükəsizlik Şurasının sədr müavini Dmitri Medvedevin son paylaşımından bəhs edərkən deyib. O, qeyd edib ki, denasifikasiyasını və demilitarizasiyasını Rusiya əhalisinə izah edə bilməyənlər daha rahat izahat seçməyə məcbur olublar:
“İndi Rusiya dövlətinin ən yüksək rəsmilərindən tutmuş, onun təbliğatçısı olan hər kəs Ukraynaya qarşı təcavüzün səbəbini şeytanla mübarizə ilə izah edir. “Lüsifer”, “Satana”, “İblis” sözləri sürətlə Rusiya ictimai-siyasi leksikonunda yer tutmaqdadır. Əlbəttə, Putin, Medvedev, Patruşev, Kadırov, hətta Dugin və patriarx Kiril kimilərin satananın, şeytanın varlığına inandığını düşünmək sadəlövhlük olardı. Şeytan və iblis varsa, elə ilk növbədə onların özləridir. Bunu da onlar hamıdan yaxşı bilir”.
Ekspertin sözlərinə görə, Rusiya əhalisinin böyük hissəsi bu uydurmalara, cəfəngiyyata inanacaq qədər cahilləşdirilib: “İndi bəşəriyyətin əsas vəzifəsi əlində növbənöv nüvə silahları olan cahil ölkədən və onu idarə edən əsl iblislərdən, satanalardan, lusiferlərdən qorunmaqdır”.
Xatırladaq ki, ötən gün Dmirti Medvedev Milli Birlik Günü münasibətilə “Telegram” hesabındakı mesajında “Biz hazırda bir dəstə çılğın nasist narkomanlara, onlar tərəfindən qorxuya məruz qalan insanlara və qərb itxanasından hürən böyük bir sürüyə qarşı mübarizə aparırıq. Əslində bütün düşmənləri odlu cəhənnəmə göndərmək imkanımız var. Lakin bu, bizim vəzifəmiz deyil. Yaradanın sözünü qəlbimizdə dinləyir və ona əməl edirik. Bu sözlər bizə müqəddəs məqsəd verir. Məqsəd isə hansı addan istifadə etməsindən asılı olmayaraq, cəhənnəmin ali hökmdarını – Şeytan, Lüsifer və ya İblisi dayandırmaqdır. Çünki onların məqsədi ölümdür. Bizimki isə həyat...Onların silahı mürəkkəb yalandır, bizdə isə həqiqət...Ona görə də davamız haqq davasıdır və qələbə bizim olacaq!”, deyə o söyləmişdi.
Günay Rəsulqızı
