Ermənistanın törətdiyi Bərdə terrorundan iki il ötür.

Sfera.az xatırladır ki, Ermənistan Silahlı Qüvvələri oktyabrın 27-də xain və qəddarcasına cəbhədən kənarda yerləşən Qarayusifli kəndini "Smerç" raketləri ilə atəşə tutub.

Nəticədə dinc sakinlər - Cəfərova Ofeliya Məcid qızı, Əhmədova Aybəniz Əşrəf qızı, İsmayılov Ehtiram Xəlil oğlu, 2013-cü il təvəllüdlü İsgəndərova Aysu Rövşən qızı və Əliyeva Almaz Salah qızı şəhid olub, 13 nəfər xəsarət alıb.

Oktyabrın 28-də şəhərə növbəti raket hücumu nəticəsində Yalçın Rizvan oğlu İsgəndərov, Ağamoğlan Bəylər oğlu Quliyev,  Hümbət Süleyman oğlu Süleymanov, Solmaz Sədrəddin qızı Qasımova, Fazil Hacı oğlu Hacıyev, Leyla Elmir qızı Mustafayeva, Məhərrəm Ənvər oğlu Mustafayev,  Çərкəz Xanlar oğlu Mirzəliyev, Gülşən Mehrab qızı Hüseynova,  Mirsaqi Yusif oğlu Əhmədov,  İntiqam Ələmdar oğlu Xıdırov, Əsgər Mahir oğlu Allahverdiyev, Ruslan Məhəmməd oğlu Abbasov,  Sadiq Sahib oğlu Əliyev,  Fuad İsa oğlu İsmayılov, Amil Fazil oğlu Cəfərov, Dəyanət Tahir oğlu Kazımov,  Vasif Vaqif oğlu İsmayıllı, Rəşaf Vaqif oğlu Şəfiyev,  Tüкəzban Çərкəz qızı Mirzəliyeva,  Niftalı Səlim oğlu Paşayev həlak olub və 60 nəfər yaralanıb.

Qeyd edək ki, 44 günlük Vətən müharibəsi ərzində Bərdə rayonu və şəhər mərkəzi 3 dəfə - 5, 27 və 28 oktyabrda Ermənistan Silahlı Qüvvələrinin raket və ağır artilleriya hücumlarına məruz qalıb. Nəticədə 8-i qadın, 19-u kişi, 2-i uşaq olmaqla 29 nəfər şəhid olub, 112 nəfər yaralanıb. Rayonda yerləşən mülki infrastruktur obyektlərinə, nəqliyyat vasitələrinə külli miqdarda ziyan dəyib.

Faktla bağlı Baş Prokurorluqda Cinayət Məcəlləsinin 120.2.1-ci (cinayətkar birlik-təşkilat tərəfindən qəsdən adam öldürmə), 120.2.4-cü (xüsusi amansızlıqla və ya ümumi təhlükəli üsulla qəsdən adam öldürmə), 120.2.12 (milli, irqi, dini ədavət və ya düşmənçilik niyyəti ilə qəsdən adam öldürmə), 100.2 (təcavüzkar müharibəni aparma) və digər maddələri ilə cinayət işi başlanaraq ibtidai istintaqın aparılması prokurorluğun İstintaq idarəsinə həvalə edilib.