Moldovada fövqəladə vəziyyət iki ay uzadıldı

Moldova parlamenti Ukraynadakı vəziyyət və enerji böhranı ilə əlaqədar fövqəladə vəziyyət müddətini uzadıb.

Sfera.az xarici mətbuata istinadən bildirir ki, bu barədə respublikanın baş naziri Natalya Qavrilitsa açıqlama verib.

Qərar parlamentdə 53 səs çoxluğu ilə təsdiqlənib. Moldova müxalifəti isə buna etiraz olaraq toplantını tərk edib.

Fövqəladə tədbirlərin vacibliyini qeyd edən Qavrilitsa bu qərarın həm Rusiya qazının, həm də Dnestryanı və Ukraynadakı elektrik stansiyalarından ölkəyə idxalının dayandırılması ilə bağlı olduğunu açıqlayıb.

“Qaçqın axını və xammal tədarükü ilə bağlı riskə gedə bilmərik. Hər birimiz Avropaya qaz tədarükü ilə bağlı o qədər də ümidverici vəziyyət olmadığının şahidiyik”-deyə Qavrilitsa bildirib.

Xatırladaq ki, Oktyabrın 2-də Kişinyovda Moldovanın “Şor” müxalifət partiyası nümayəndələrinin kütləvi etiraz aksiyası başlayıb. Etirazçılar sentyabrın 18-dən etiraz aksiyasının keçirildiyi ölkə parlamentinin qarşısında çadır şəhərciyi qurublar.

Minlərlə vətəndaş prezident Maia Sandunun istefasını tələb edir. Xüsusən də etirazçılar hakimiyyətin siyasətindən, qaz və məhsulların qiymət artımından narazıdırlar.


Avqustun 31-də ölkə prezidenti əhalini qaz istehlakını mümkün qədər azaltmağa çağırmışdı. O, bu çağırışı qışda qazın qiymətinin bahalaşacağından ehtiyat etməsi ilə izah etmişdi.

Aynil