“OPEC plyus”un qərarı ABŞ-ı qəzəbləndirdi: Ağ Evdən Körfəz ölkələrinə ZƏNG

“OPEC plyus” ölkələrinin gündəlik neft hasilatını kəskin şəkildə azaltmaq qərarı ABŞ-ı qəzəbləndirib.

Sfera.az xəbər verir ki, koalisiyaya qoşulan ölkələr gündəlik hasilatı 2 milyon barel azaltmaq haqqında razılığa gəlib. Koalisiya bu qərarını qlobal iqtisadiyyatın zəifləməsi nəticəsində neft qiymətlərindəki enişlə əlaqələndirib. Bu qərardan sonra “Brent” markalı neftin qiyməti 85 dollardan 93 dollara qədər artıb.  

“Bloomberg”in məlumatına əsasən, bu qərar neft hasilatında ciddi azalma yaratmayacaq. Çünki üzvlərin bəziləri öz kvotasından xeyli aşağı məhsul istehsal edir. Bu o deməkdir ki, onlar əlavə istehsal azaldılması olmadan yeni limitlərə əməl edirlər.

“Bloomberg”in hesablamalarına görə, 2 milyon barel azalma qərarı faktiki olaraq yalnız səkkiz ölkədən hasilatı azaltmağı tələb edəcək. Həmin ölkələr ümumilikdə gündəlik hasilatı 880 min barel azaltmalı olacaq.

Buna baxmayaraq, ABŞ qərardan geri addım atmağı tələb edib. ABŞ bildirir ki, dünyada yüksək qiymətlərin müşahidə edildiyi indiki dövrdə “OPEC plyus”un qərarı neft qiymətlərini yenidən artıracaq və nəticədə yüksək bahalaşma davam edəcək. 

“Bloomberg”ə danışan mənbələrə görə, ABŞ rəsmiləri Körfəz ölkələrindəki həmkarlarına zəng edərək, hasilatın azaldılmasından geri çəkilmələrini istəyib. 

Vasif,
Sfera.az