Rusiya prezidenti Vladimir Putinin qismən səfərbərlik elanından sonra ölkənin böyük şəhərlərində etirazlar başlayıb. Rusiya Daxili İşlər Nazirliyi ölkədəki sabitliyi təmin etməyə cəlb olunub, bu barədə artıq sosial mediada müvafiq sənədin surəti də paylaşılıb.

Baş verənlər fonunda isə Putinin hakimiyyətdən uzaqlaşdırılması məsələsi yenidən gündəm olub.

Maraqlıdır, ölkədəki etirazlar Vladimir Putinin sonunu gətirə bilərmi?

Sfera.az bildirir ki, bununla bağlı fikirlərini bölüşən politoloq Ərəstun Oruclu deyib ki, hazırda dünyanı nüvə silahı ilə təhdid edən Putinin və onun komandasının daha çox daxili durumdan narahatlığı göz önündədir:

“Bu da təbiidir, çünki Rusiya tipli rejimlərin ən qatı düşməni onların onilliklər boyu düşmən kimi davrandığı xalqlarıdır. Amma atılan və atılacaq bütün preventiv addımlara rəğmən Rusiyanın qeyri-sabitlik burulğanına daxil olacağı obyektiv reallıqdır. Bundan qismən qaçmağın yeganə yolu Putinin hakimiyyətdən kənarlaşdırılmasıdır. Bunun da yaxın zamanlarda baş verəcəyi qaçılmazdır, çünki Rusiyanın buna alternativ ola biləcək yolu kimi daxildə sərt rejim tətbiq etmək üçün də resursları tükənməkdədir. Qaldı, Putinin hansı şəkildə yola salınmasına, bu, artıq texniki məsələdir. Rus dövlətinin belə işlərdə azı 300 illik təcrübəsi var”.

Ekspert Putinin hakimiyyətdən kənarlaşdırılacağı halda, bunun daxildə və ya Ukrayna cəbhəsində dönüş yarada bilib-bilməyəcəyi məsələsinə də toxunub:

“Yüksək ehtimalla dönüş yarada bilməyəcək. Çünki Ukraynanın öz torpaqlarını işğaldan tam azad etməkdə israrlı olması Rusiya ordusunun məğlubiyyətinin davamı, bu da öz növbəsində daxili gərginliyin artması demək olacaq. Putin rejimin çöküşü və hətta onun dekorativ dəyişikliyi belə Rusiyanın postsovet ölkələrdəki, o cümlədən də Azərbaycandakı əlaltılarının da məğlubiyyətinə yol açacaq. Bu da postsovet məkanda yeni ictimai-syasi eranın başlanğıcı üçün şans demək olacaq. Şans isə hələ heç də mütləq baş verəcək reallıq demək deyil”.

Günay Rəsulqızı