Bu il Azərbaycanda əsas kapitala investisiya qoyuluşunda artım müşahidə edilib. 

Sfera.az rəsmi məlumatlara istinadən xəbər verir ki, 2022-ci ilin yanvar-avqust aylarında əsas kapitala 9,12 milyard manat məbləğində sərmayə qoyulub. Real göstəricilərlə müqayisədə bu il investisiya qoyuluşunda 6,9 faiz artım var. 

İnvestisiyaların artması qeyri neft-qaz sektoru ilə bağlıdır. Neft-qaz sektoruna yatırılan investisiyaların həcmi 13,1 faiz azaldığı halda, qeyri neft-qaz sektoruna yönəldilən vəsaitin həcmi 22,5 faiz artıb. 

İstifadə olunan investisiya vəsaitinin 5,306 milyard manatı və ya 58,2 faizi məhsul istehsalı sahələrinə, 3,3 milyard manatı (36,1 faizi) xidmət sahələrinə, 518,7 milyon manatı (5,7 faizi) isə yaşayış evlərinin tikintisinə sərf olunub. 

Əsas kapitala yönəldilmiş vəsaitlərin 6,843 milyard manatını və ya 75,1 faizini daxili vəsaitlər təşkil edib. Əsas kapitala yönəldilən vəsaitlərin 6,643 milyard manatı və ya 72,9 faizi bilavasitə tikinti-quraşdırma işlərinin yerinə yetirilməsinə sərf olunub.

Əsas kapitala yönəldilmiş vəsaitin ümumi dəyərində müəssisə və təşkilatların vəsaitləri 51 faiz, büdcə vəsaitləri 34,5 faiz, əhalinin şəxsi vəsaitləri 7,2 faiz, sair vəsaitlər 4,4 faiz, bank kreditləri isə 2,9 faiz təşkil edib.

Vasif,
Sfera.az