2022-ci ilin yanvar-avqust aylarında ölkəmizdə 84,88 milyard manatlıq (49,93 milyard dollar) ümumi daxili məhsul (ÜDM) istehsal olunub. Bu, əvvəlki ilin eyni dövrü ilə müqayisədə real göstəricilərlə 5,8 faiz çoxdur.

Sfera.az Dövlət Statistika Komitəsinə istinadən xəbər verir ki, istehsalda artım daha böyük ola bilərdi. Amma neft-qaz sektorunda istehsalın 2 faiz azalması ümumi göstəricilərdəki artımı bir qədər zəiflədib. Bu il iqtisadiyyatda böyümənin yeganə səbəbi qeyri neft-qaz sektoru ilə bağlı olub. Qeyd edilən sektorda 10,3 faiz artım əldə edilib.

ÜDM istehsalının 52,5 faizi sənaye, 7,9 faizi ticarət; nəqliyyat vasitələrinin təmiri, 6,1 faizi nəqliyyat və anbar təsərrüfatı, 5,1 faizi kənd təsərrüfatı, meşə təsərrüfatı və balıqçılıq, 3,9 faizi tikinti, 1,5 faizi turistlərin yerləşdirilməsi və ictimai iaşə, 1,3 faizi informasiya və rabitə sahələrinin, 14,1 faizi digər sahələrin payına düşüb. Məhsula və idxala xalis vergilər ÜDM-in 7,6 faizini təşkil edib.

Əhalinin hər nəfərinə düşən ÜDM-in məbləği isə 8440,1 manata bərabər olub.

Vasif,
Sfera.az