Universitetlər arasında rəqabət getdikcə güclənir: Rüşvətin olmaması...

“Rüşvətin olmaması universitetlərin keyfiyyət göstəricisi hesab olunmur. DİM-in açıqladığı rəsmi rəqəmlərə görə, builki qəbulun nəticələrinə əsasən bir neçə universitet var ki, əvvəlki illərlə müqayisədə xeyli uğurlu nəticələr qazanıblar”.

Sfera.az bildirir ki, bunu Azərbaycan İnternet Forumunun rəhbəri Osman Gündüz deyib. 

O qeyd edib ki, uzun illər müxtəlif ixtisaslarda oturuşmuş mövqeləri olan, yüksək bal toplayanları "qamarlayan" universitetlər indi bu mövqeləri digər universitetlərlə bölüşməli olublar:

“Görünən odur ki, hansısa oturuşmuş maliyyə "yastığı" olmayan elə universitetlər (UNEC, AzTU, ADPU, ADNSU, Qərbi Kaspi, regionallardan MDU və s.) var ki, yaxın müddətdə onlar ölkədə ciddi rəqabətli mühit formalaşdıra biləcəklər. 

Onların regional və qlobal təhsil platformalarına inteqrasiyası getdikcə sürətlənir, ikili diplom proqramların sayı xeyli artıb və proses getdikcə güclənəcək”.
O. Gündüzün sözlərinə görə, əksər universitetlərdə son illər rüşvət və korrupsiya minimuma enib:

“Artıq rüşvətin olmaması universitetin keyfiyyət göstəricisi hesab olunmur.

Hökumətin son zamanlar qəbul etdiyi strategiyalarda da tədqiqat yönümlü, rəqabətə davamlı, rəqəmsallaşan, əmək bazarının tələblərinə cavab verən universitetlərin formalaşmasından söhbət gedir.

Yeri gəlmişkən, düşünürəm ki, hökumət və Təhsil Nazirliyi də universitetlərin müstəqilliyinin artırılmasına, publik hüquqi şəxslər olaraq daha çox maliyyə, tədris, idarəetmə  və akademik hüquqların universitetlərə verilməsinə diqqəti artırmalıdır.

İndiki şəraitdə universitetlərin muxtariyyəti ilə bağlı vəziyyət qənaətbəxş hesab oluna bilməz, hətta publik şəxslər olsa belə”. 

Turan Rzayev,

Sfera.az