Yaxın aylarda “Qızılalma”nın uçuşlarına başlanılacaq: Bayraktar tarixi açıqladı
Türkiyə pilotsuz qırıcı təyyarələrin istehsalına 2023-cü ilin birinci rübündə başlayacaq. Gələn ilin birinci rübündə “Qızılalma” adlandırılan pilotsuz döyüş təyyarəsi ilk uçuşlarını həyata keçirəcək.
Sfera.az Türkiyə mediasına istinadən xəbər verir ki, bu haqda məlumatı “Baykar Texnoloji” şirkətinin rəhbəri Haluk Bayraktar açıqlayıb.
Türkiyədə 6-cı TEKNOFEST sərgisində iştirak edən Bayraktar 2500 nəfərlik heyətin yeni növ insansız uçuş aparatının hazırlanması üçün çalışdığını bildirib.
Bayraktar söyləyib ki, pilotsuz döyüş təyyarəsi klassik döyüş təyyarələrindən daha ucuz olacaq. Havada 5-6 saat qala biləcək təyyarə öz çəkisindən başqa 2 ton yük götürmək qabiliyyətinə də malik olacaq.
Qeyd edək ki, adıçəkilən türk şirkəti “TB-2” və “Akıncı” adlarında 2 məşhur pilotsuz döyüş təyyarələrini istehsal edib. Bu təyyarələrdən “TB-2” bir neçə müharibədə özünü yüksək keyfiyyətləri ilə doğruldub. Buna görə də, 23 ölkə “TB-2”lərin idxalı üçün rəsmi müraciət edib.
“Akıncı” modelinə də tələb güclüdür və bir neçə ölkə onun idxalına çalışır.
Haluk Bayraktar “Qızılalma” pilotsuz qırıcılarının da digər pilotsuz uçuş aparatları qədər böyük tələb görəcəyinə əmin olduqlarını vurğulayıb.
Vasif,
Sfera.az
