Qarabağda yeni antiterror əməliyyatları başladıla bilər – Deputatdan açıqlama
![Qarabağda yeni antiterror əməliyyatları başladıla bilər – Deputatdan açıqlama](https://sfera.az/photo/orginal/2022/08/22/1661152237_esas.jpg)
Sosial Tədqiqatlar Mərkəzinin sorğusu göstərir ki, rəyi öyrənilənlərin 80 faizi 2020-ci il 10 noyabr üçtərəfli bəyanatının şərtlərinə əməl edilməzsə, antiterror əməliyyatlarının aparılmasını dəstəkləyir”.
Sfera.az bildirir ki, bunu deputat Sahib Alıyev deyib. O qeyd edib ki, indiyədək baş verənlərə nəzər salanda, Ermənistanın ancaq belə addımlar atıldıqda üzərinə götürdüyü öhdəliklərin bir qismini yerinə yetirdiyinin şahidi oluruq:
“İstisna etmirəm ki, Ermənistan rəhbərliyi gələcəkdə də bu "ənənə"ni davam etdirəcək. Təkcə ona görə yox ki, onlar ancaq güc dilini başa düşürlər. Paradoksal görünsə də, avqustun 3-dəkinə bənzər əməliyatlar Paşinyanla komandasındakılara da əl verir”.
Millət vəkili bildirib ki, Qarabağdakı Rusiya hərbi kontingentinin Azərbaycan ordusunun önünü kəsməməsi Ermənistan baş nazirinin əsas rəqiblərinin - Moskvaya bağlı qruplaşmaların əleyhinə işləyir:
“Bununla yanaşı, Kremlin rəsmi İrəvan üzərindəki təsirini zəiflədir. Bax, bu reallığa dayanaraq demək olar ki, Qarabağda gələcəkdə yeni antiterror əməliyyatlarının aparılması ehtimalı da elə hardasa 80 faizdir”.
Qeyd edək ki, Sosial Tədqiqatlar Mərkəzinin son sorğusunun nəticələrinə əsasən, respondentlər Ermənistanın 10 noyabr tarixli birgə bəyanatın şərtlərinə əməl etməməsi halında, Azərbaycanın hərbi əməliyyatları bundan sonra da davam etdirməsini dəstəklədiklərini ifadə ediblər.
“Belə ki, rəyi öyrənilənlərin mütləq əksəriyyəti - 80,5%-i Azərbaycanın hərbi əməliyyatları bundan sonra da davam etdirməli olduğunu düşünür. Hərbi əməliyyatları erməni terrorçularının Qarabağdan çıxarılmasının əsas təminatı olaraq görən respondentlərin 84,1%-i bu əməliyyatların davam etdirilməsini dəstəkləyib. Nəticələrin gender aspektindən statistik təhlili bizə onu deməyə əsas verir ki, kişilər qadınlarla müqayisədə Azərbaycanın öz ərazisində qanunsuz erməni silahlı qruplaşmalarına qarşı apardığı hərbi əməliyyatları davam etdirməsini daha çox istəyirlər. Əks mövqedə qərarlaşan (6,8%), eləcə də bu suala cavab verməkdə çətinlik çəkən (12,8%) respondentlər mövqeyini əsasən itkilərin olmasını istəmədikləri ilə əlaqələndiriblər”, deyə STM-in məlumatında bildirilib.
Günay Rəsulqızı