Krımda yerləşən 56-cı qvardiya hava hücumu alayında xidmət edən Pavel Filatyevin açıqlamaları dünya mediasında gündəm olub.

Sfera.az bildirir ki, paraşütçüləri ilə birlikdə Xersona daxil olub limanı ələ keçirən, sonra Nikolayevə gedib bir ay ağır artilleriya atəşi altında yaşayan həmin əsgər “VKontakte” sosial media platformasındakı səhifəsinə daxil olaraq savaş barədə 141 səhifəlik yazı dərc edib. O, zəif təchiz olunmuş bölməsinin fevralın sonunda Ukraynaya necə hücum etdiyini təsvir edib:

“Torpağımıza heç bir hücum olmadı və mən həftələrlə özümə bu sualı verdim -  Bu müharibə niyə başladı? Döyüşməkdən qorxmuram, amma etdiyimin doğru olduğunu bilmək üçün ədaləti hiss etməliyəm. İnanıram ki, biz ruslar uğursuzluğa düçar oluruq, çünki etdiyimizi düzgün hesab etmirik”.

Pavel müharibədən əvvəl ona verilən tüfəngin qayışının paslanmış və sınıq olduğunu qeyd edib:

”Bölməmiz Ukrayna artilleriyasının atəşi altında, müharibə davam edərkən, təxminən bir ay Nikolayev yaxınlığındakı səngərlərdə qalıb. Orada güllə gözümə palçıq sıçratdı və infeksiyaya səbəb oldu, az qala kor olacaqdım. Rusiyanın təbliğatında təsvir ediləndən fərqli olaraq, orduda qəzəb və inciklik hökm sürür. Orduda olan insanların çoxu orada baş verənlərdən, hökumətdən və komandirlərdən narazıdırlar”.

Rusiyalı əsgər fikirlərini “mən bu müharibənin əleyhinəyəm, amma general deyiləm, müdafiə naziri deyiləm. Savaşı necə dayandıracağımı bilmirəm. Qorxaq olmaq, silahımı, yoldaşlarımı atmaq - bunları etməsəydim, danışa bilməzdim. Mən sadəcə bundan sonra nə olacağından qorxuram”, deyə yekunlaşdırıb.

Yazını dərc edən “The Guardian” qəzeti isə Filatyevin hekayəsinin bütün təfərrüatlarını tam olaraq təsdiqləyə bilməyib, lakin sənədlərlə sübut olunub ki, rus əsgər Krımda 56-cı qvardiya hava hücumu alayında xidmət edib, döyüşlərdə yaralanıb.

Məlumata görə, Pavel həqiqəti ictimaiyyətə çatdırdıqdan sonra bütün bölməsi onunla əlaqəsini kəsib. Qeyd olunub ki, Pavel Filatyevin əsas planı savaşla bağlı xatirələrini dərc etdirmək və dərhal polisə təslim olmaq idi.

Günay Rəsulqızı