“Zaman-zaman ölkənin müxtəlif regionlarında turistlərlə bağlı narazı fikirlərin səsləndiyi müşahidə edilir”.

Bunu Sfera.az-a açıqlamasında turizm üzrə ekspert Samir Dübəndi deyib.

O bildirib ki, bəzən yerli əhali şortikdə gələn turistlərin onların mənəvi həyat qaydalarını pozduğunu, spirtli içkilərdən istifadə etdiklərini vurğulayırlar:

“Bu fikirlər normaldır və yerli əhalinin narazılığı da başa düşüləndir. Hesab edirəm ki, sakit şəraitdə yaşamaq onların hüququdur, xüsusilə bu, kənd yerləridirsə. Belə bölgələrdə həyat şəraitinin dəyişməsi insanların mənəviyyatına, psixoloji durumuna təsir göstərir. Bu məsələni necə tənzimləmək olar? Təbii ki, turizmin mənfi təsirləri də var – səs-küyün yaranması və.s. Düşünürəm ki, dövlət turizm qurumları bu mövzulara daha ciddi yanaşmalıdırlar. Bilməlidirlər ki, hansı kəndlərə nə qədər turist üz tutur, orada olan bütün detallar nəzərdən keçirilməlidir, o cümlədən yerli əhalinin həm məşğulluğa cəlb olunması, həm də onların dinc həyatlarının qorunması. Bilirsiniz ki, xüsusilə ucqar kəndlərə xas olan etnik, folklor, mədəni, tarixi xüsusiyyətlər var və bu icmaları biz özəlliklə qorumalıyıq”.

Müsahibimiz qeyd edib ki, yerli bələdiyyələrin də turizmin inkişafında marağı tam olaraq aydın deyil:

“Bu istiqamətdə maarifləndirmə işlərinə də ehtiyac var. Digər tərəfdən turizmin regionlarda inkişafı yerli əhalinin sosial-iqtisadi durumunun yaxşılaşdırılması ilə bilavasitə bağlıdır. Burada söhbət təkcə iş yerlərinin açılmasından getmir. Kənd yerlərində  bilirik ki, daha çox sağlam qida istehsal olunur, regiona xas məhsullar hazırlanır, onların satışı, istehsalı üçün də şərait yaradılmalıdır. Həmin məhsulları turistlərə sataraq da təkcə maliyyə qazancı əldə edilmir, həm də Azərbaycanın ləziz qidalarını, mədəniyyətini tanıtmış oluruq. Bunun da üzərində çalışmaq lazımdır. Yerli əhalini bu prosesdən təcrid etmək olmaz. Hər halda turist axınını ciddi surətdə tənzimləməyə ehtiyac var. Bununla yanaşı, regionlarda təbiətə ziyan vurmaq, yerli əhalinin narazılığına səbəb olmaq düzgün deyil”.

Günay Rəsulqızı,

Sfera.az