Lotereya oyunlarında uduş fondu ilə bağlı minimum hədd gözlənilməlidir - Ekspert 

“Lotereya oyunlarında uduş fondu ilə bağlı minimum tələb qanunvericiliklə tənzimlənir. Qanun tələb edir ki, uduş fondu biletlərin ümumi dəyərinin 50 faizdən az ola bilməz. Ölkəmizdə bu tələb gözlənilir və mövcud uduş fondları 50 faizdən yüksəkdir.”

Bunu iqtisadçı-ekspert Xalid Kərimli Sfera.az-a açıqlamasında bildirib. X.Kərimli söylədi ki, qanunvericilikdəki 50 faiz tələbi uduş fondunun minimum limitini müəyyən edir:

“Qanunun bu tələbinə görə lotereya oyununu keçirən şirkət biletlərin dəyərinin ən azı yarısı qədərində uduş fondu müəyyən etmək səlahiyyəti var. Oyunu təşkil edən qurumlar bu zaman minimum 50 faiz, yaxud toplanan vəsaitin daha çox hissəsini uduşa yönəltməkdə tam sərbəstdir. Şirkət lotereya oynayanları həvəsləndirmək üçün uduş fondunu artıra, hətta oyunu təşkil edən qurumun şəxsi vəsaitləri də yönəldilə bilər. Uduş fondu ilə bağlı maksimum limit yoxdur, yalnız minimum hədd var və buna əməl etmək lazımdır”.

X.Kərimli hesab edir ki, dövlət şirkəti olan “Azərlotereya”nın Türkiyənin tanınmış özəl şirkətinə idarəetməyə verilməsindən sonra bu sahədə peşəkar menecment işi tətbiq olunur, lotereya oyunlarının təşkili peşəkar mütəxəssislər tərəfindən həyata keçirilir.

Onun fikrincə, uduş fondları idarəetməyə götürən türk şirkətinin strategiyasına, aparılan araşdırmalarına əsasən müəyyən edilir:

“Əlbəttə ki, şirkət lotereya satışından yığılan pulun hamısını uduşa yönəldə bilməz. Şirkətin inzibati xərcləri var, hər oyunla bağlı çəkilişlərə görə, reklamla əlaqədar xərclər var, bundan başqa “Azərlotereya”nın mənfəəti və dövlətə ödədiyi vergilər var. Lotereyanı təşkil edən qurum uduş fondunu müəyyən edən zaman bu xərc maddələrini hökmən nəzərə alır”.

Vasif

Sfera.az