Son vaxtlar Meksikada bir-birinə müharibə elan edən narkokartel üzvləri arasında da düşmən qruplaşmasının əsir alınmış üzvlərinin başları kütləvi kəsilir.

Bununla da, narkobaronlar həm ictimaiyyətə, həm də rəqiblərinə kompromissiz olduqlarını nümayiş etdirirlər.

Kəsik başlarla göndərilən ismarıc

Ötən ilin sentyabrında Uruapan şəhərindəki diskotekaların birinə daxil olan silahlı kişilər döşəməyə torbalardan çıxardıqları 5 insan kəlləsini atdılar. Diskotekada əylənənlər dəhşət içində idilər. Amma silahlılar onlara dəymədi. Sadəcə, masalardan birinin üstünə içində yazı olan kağız parçası qoydular və çıxıb getdilər.

Kağızda isə: "bu gündən şəhər yeni yaradılmış narkokartelə - Miçiokan ailəsinə məxsusdur” sözləri yazılmışdı.

Öldürülənlər isə indiyədək şəhərdə narkotik alveri ilə məşğul olan yerli qanqsterlər idi.

Ritual qətllər

Bir vaxtlar BMT-də narkotiklərlə bağlı cinayətlər üzrə şöbədə məsləhətçi işləmiş Samuil Qonsales Ruis bu ölümlərlə bağlı maraqlı açıqlama verib: "Ötən əsrin 90-cı illərində narkokartellər arasında baş kəsmək kimi adət yox idi. Bu, yeni dəbdir. Əvvəllər başqa rituallar vardı. Muzdlu qatillər müxtəlif üsullarla öldürürdülər. Hər qətldə məna olurdu.

Məsələn, əgər güllə qurbanın peysərindən vurulurdusa, demək, öldürülən adam polisə, ya da başqa qruplaşmaya satqınlıq edibmiş. Gicgahdan vurulan güllə isə öldürülənin rəqib qruplaşmadan olduğuna işarə idi.

Baş kəsmək praktikası isə Meksikaya Qvatemaladan gəlib. Bu ölkədə 30 il vətəndaş müharibəsi gedib. Qarşı tərəflər bir-birlərinin başını kəsməyə öyrəniblər.

90-cı illərin sonlarında Los Zetas karteli yarandı. Bu kartelin rəhbərliyi əsasən keçmiş Qvatemala ordusunun zabitləri idi. Narkokartel tədricən gücləndi. İndi  Los Zetas  Meksikanı da, Mərkəzi Amerika dövlətlərinin çox hissəsini də nüfuzu altına alıb. Onlar baş kəsmək kimi praktikanı da özləri ilə gətiriblər”.

Terror strategiyası

Narkokartellər arasında isə müharibə qızışır. May ayında ölkədə başı kəsilmiş 80 cəsəd tapılıb. Həmin ay Texas ştatı ilə sərhəddə 14 mafioz bu üsulla edam olunub. Turistlərin Meksikada xoşaldıqları yerlərdən biri olan Çapala gölünün yaxınlığında, atılmış mikroavtobuslardan 18 kəsilmiş baş tapılıb. Bu günlərdə isə polis  Monterey şəhəri ətrafında plastik torbalarda başı kəsilmiş 49 meyit aşkarlayıb.

Bəs mafiozların bu cür qəddar üsula əl atmalarının səbəbi nədir? Ölkənin daxili işlər naziri Alessandro  Poire deyib ki, mafiozlar bu üsulla əhalini və hakimiyyət nümayəndələrini qorxu altında saxlamaq istəyirlər: "Onların nə demək istədikləri aydındır. Bizə toxunmayın, əks halda, sizin də başınıza bu gələ bilər.”