Avtomobili olanlara bəd xəbər - Mühərrik yağları bahalaşdı
Avtomobillərin mühərrik yağlarının qiymətində nəzərə çarpacaq dərəcədə artım müşahidə edilir. Əvvəl 45-50 manata satılan mühərrik yağları indi 60-65 manata təkilif olunur. Sürücülərin sözlərinə görə, bahalaşma bir neçə aydır, davam edir.
Sfera.az xəbər verir ki, mövzu ilə bağlı danışan iqtisadçı ekspert Natiq Cəfərli deyib ki, mühərrik yağlarının bahalaşması dünyadakı neft qiymətləri ilə bağlıdır:
“Mühərrik yağları neftdən alınan məhsuldur. Neftin qiyməti isə son bir ildə iki dəfədən çox bahalaşıb. Məlumat üçün deyə bilərəm ki, ötən ilin sonlarına doğru artan neft qiymətləri bu ilin əvvəlindən 100 dollar səviyyəsində qərarlaşıb. Son günlər isə yenidən artaraq 110 doları keçib. Neftin qiyməti artdığı üçün avtomatik olaraq neft məhsullarının da qiyməti artır”.
Ekspertin sözlərinə görə, davam edən Rusiya-Ukrayna müharibəsi və pandemiya bir sıra problemləri də ortaya çıxarıb:
“Logistika da çətinləşib, yol xərcləri artıb. Rusiya-Ukrayna müharibəsi Qara dəniz daşımaçılığına ciddi təsir edib. Konteynerlərin qiymətləri çox bahalaşıb. İki il bundan qabaq icarəsi 1000 dollar olan konteynerler hazırda 4-5 dəfə baha qiymətə icarəyə verilir. Bütün bunlar nəticə etibarilə motor yağlarının da qiymətinin qalxmasına gətirib çıxarıb”.
N. Cəfərlinin sözlərinə görə, Azərbaycan neft ölkəsi olmasına rəğmən bu illər ərzində özünün yerli məhsullarını yarada bilməyib:
“Bu sahədə yerli istehsalın həcmi çox kiçikdir. Halbuki Azərbaycan nefti həm tərkibin təmizliyi, həm də keyfiyyəti baxımından bir çox ölkəni geridə qoyur. Müqayisə üçün deyə bilərəm ki, Azərbaycandan ən çox neft idxal edən ölkələr İsrail və İtaliya hazırda bu sahədə dünya liderlərindəndir. Yəni bazarın tələbatını özümüz qarşılaya bilsək, bu kimi qiymət artımlarının da qarşısını ala bilərik”.
Turan Rzayev