Sfera.az-ın məlumatına görə, bu barədə danışan politoloq Elçin Mirzəbəyli sözügedən qurumun öz ömrünü başa vurduğunu və bunu yekun bəyanatın təsdiq etdiyini deyib:

"KTMT, zənnimcə artıq "süni nəfəs aparatına” qoşulub. Yekun bəyanatda yer alan əsas detallar da bunu sübuta yetirir. Belə ki, bəyanatda Avrasiya regionunda "davamlı sülhün əldə edilməsi”nin vacibliyi və KTMT-nin Avratlantik Alyansla praktiki əməkdaşlığa hazır olduğu vurğulanır. Burada diqqət çəkən bir vacib məqam var: Rəsmi Moskva "gərginliyin azaldılması” ilə bağlı özünün deyə bilmədiklərini KTMT-nin vasitəsilə ifadə edir. Bu, dolayısıyla Rusiyanın gərginliyə davam gətirmədiyinin, NATO ilə, hələlik bəlli olmayan şərtlər, yaxud güzəştlər çərçivəsində, praktiki əməkdaşlığa hazır olduğunun etirafıdır”.

"Öz üzvləri tərəfindən hər kəlməbaşı ciddiliyi şübhə altına alınan bir təşkilatı hansı səbəblərdən tərəf saysınlar ki? KTMT-nin "zirvə toplantısı”nın görünən tərəfinə gözucu nəzər salmaq yetərlidir ki, üzvlərin zorla bir araya gətirildiyini, öz dediklərinə özlərinin belə inanmadığını müəyyənləşdirə biləsən. Yekun bəyanatda Rusiyanın Ukraynaya hərbi müdaxiləsi ilə bağlı bircə kəlmə də yer almayıb, Moskvaya dilucu dəstək belə ifadə olunmayıb. Sadəcə KTMT üzvlərinin "nasizmin qəhrəmanlaşdırılması cəhdlərinə” qarşı birgə dayanacaqları bildirilib. Həm də nasizmi qəhrəmanlaşdıranların iştirakı ilə... Hər kəsə bəllidir ki, nasizmi qəhrəmanlaşdıranların başında ermənilər və onların baş naziri Nikol Paşinyan dayanır”.

Xatırladaq ki, bazar ertəsi Moskvada KTMT ölkələri liderlərinin yubiley sammiti keçirilib. KTMT ölkələrinin liderləri qitədə gərginliyin azaldılmasını vacib hesab edib, NATO ilə əməkdaşlığa hazır olduqlarını təsdiqləyiblər. "Avrasiya regionunda davamlı sülhün təmin edilməsində öz məsuliyyətimizi dərk edərək, biz qitədə gərginliyin azaldılmasının vacibliyini vurğulayır və Şimali Atlantika Müqaviləsi Təşkilatı ilə əməli əməkdaşlıq qurmağa hazır olduğumuzu təsdiqləyirik”, - deyə sənəddə bildirilib.