Daha bir ölkədə qadınlara menstruasiya məzuniyyəti veriləcək
Media
11:05 / 13.05.2022
847
İspaniya parlamenti menstruasiya zamanı şiddətli ağrıları olan qadınlara işə çıxmama icazəsi verən qanun layihəsi üzərində işləyir.
Sfera.az bildirir ki, qanun layihəsinə görə, qadınlar ayda üç gün, bəzi hallarda isə beş gün istirahət edə biləcəklər. Qanun üzərində işləyən siyasətçilər onun hələ tam yekunlaşmadığını deyiblər. Qeyd olunub ki, qanun layihəsi qüvvəyə minərsə, Avropanın bir ölkəsində ilk dəfə olaraq "menstruasiya məzuniyyəti” qanuni olaraq təmin ediləcək.
Qanun layihəsinə görə, aybaşı məzuniyyəti almaq istəyən qadınlar həkim rəyi almalı olacaqlar. Yüngül menstruasiya əlamətləri olan qadınların isə bu məzuniyyətdən yararlanması isə mümkün olmayacaq. Sözügedən layihəyə tampon, bez və s. kimi gigiyena məhsullarından verginin tutulmaması, hətta məktəb və həbsxana kimi yerlərdə bu məhsulların pulsuz paylanmasını da əhatə edir.
Qanun layihəsi doğuşa görə təyin edilən ödənişli məzuniyyət müddətini uzadır.
Parlamentin gündəliyinə çıxarılan reproduktiv sağlamlıq islahatı ilə bağlı qanun layihəsində abortla bağlı tənzimləmələr də yer alıb. Qanun layihəsi, həmçinin 16 və 17 yaşlı gənclərin abort üçün ailələrindən icazə istəməsi tələbini də aradan qaldırır. Amma güclü katolik ənənəsi olduğu üçün ölkədə həkimlərə vicdani səbəblərlə abortdan imtina etmək hüququ da verilir.
Layihənin gələn həftə Nazirlər Kabinetinə təqdim ediləcəyi gözlənilir.
Qeyd edək ki, Yaponiya, Tayvan, İndoneziya, Cənubi Koreya və Zambiyada qadınlara menstruasiya dövrünə görə xəstəlik məzuniyyəti hüququ verilir.
Günay Rəsulqızı
Sfera.az
