Ərdoğan çıxışında Suriyanın ən qısa zamanda etimad, sülh və sabitlik mühitinə çatmasını, hər bir qaçqının evini, torpağını, işini tapmasını arzulayıb.

Qeyd edək ki, suriyalıların Türkiyədə çox olmasının 2023-cü il prezident seçkiləri zamanı Ərdoğan üçün mühüm dəstək olduğu ifadə edilirdi. Prezidentin yeni layihə ilə bağlı açıqlama verməsi isə seçki nəticələrində dəyişikliklərin ola bilməsi ehtimalını artırıb.

Mövzu ilə bağlı Sfera.az-a danışan politoloq Natiq Miri suriyalıların Ərdoğana etimad məsələsində mühüm rol daşımayacağını deyib. Ekspert mitinqlər zamanı suriyalıların aktiv ola biləcəyinə diqqət çəkib:

"Suriyalılar Türkiyədə yaşasalar da, vətəndaşlıq daşımırlar və səs vermə hüququna malik deyillər. AKP-nin suriyalıların səsindən istifadə edəcəyi ilə bağlı fikirlər sadəcə təşviqat yaratmaq üçündür. Suriyalılar seçki proseslərində mitinqlərə cəlb oluna bilər ki, bu da say çoxluğu görüntüsü yaratmaq üçün gözləniləndir. Lakin düşünürəm ki, Türkiyədə indiki müxalifətin birliyi fonunda Ərdoğan və onun iştirak etdiyi Cümhur İttifaqının buna ehtiyacı yoxdur. Aparılan sorğularda da etimad məsələsi məhz Ərdoğan üçün üstünlük təşkil edir”. 

Politoloq suriyalıların gələcəkdə Suriyadakı seçki prosesinə təsir edə biləcəyini deyib:

"Suriya əhalisinin geri qaytarılması məsələsinə gəldikdə isə əsas hədəflərdən biri Türkiyənin yükünü azaltmaqdan ibarətdir. Zaman-zaman Türkiyədə türklərlə suriyalılar arasında münaqişə yaratmaq üçün təxribatlar törədilib. İndi də Türkiyəni qarışdırmaq üçün NATO strateji müttəfiqlərin bu yöndə addımları atılır. Türkiyə tədricən bu problemdən azad olmaq istəyir. Suriyada gələcəkdə yeni konstitusiya qəbul olunduqdan sonra perspektivdə BMT-nin nəzarəti altında keçiriləcək seçkilər də önəmlidir. Bu mənada əhalinin Suriyada yerləşdirilməsinə ehtiyac var ki, seçki nəticələri inandırıcı olsun. Belə olacağı təqdirdə, Türkiyənin nəzarətindəki ərazilərdə olan suriyalılar Türkiyənin istədiyi siyasi qüvvələrə dəstək verəcəklər”.