"Ajiotaj yaratmağa ehtiyac yoxdur" - Taxıl qıtlığı təhlükəsi ilə bağlı AÇIQLAMA
Media
15:47 / 20.04.2022
1465
Rusiya 80-84%, Qazaxıstan 16-20% taxıl idxalımızda paya sahib idi. Rusiya məhdudiyyətlər qoyduqdan sonra, Qazaxıstanın payı 54%-ə qaldırıldı, Rusiya 46%-ə endirildi. İndi Qazaxıstan da məhdudiyyət tətbiq edib.
Bununla bağlı Sfera.az-a açıqlama verən iqtisadçı Eldəniz Əmirov deyib ki, bu vəziyyəti qorxulu hal hesab etməyə və ajiotaj yaratmağa ehtiyac yoxdur:
"Azərbaycan ötən ilin eyni dövrülə müqayisədə taxıl ehtiyatını daha da artırıb. İkincisi isə dünya taxıl istehsal həcmləri Rusiya və Qazaxstandan ibarət deyil. Çin 135 milyon tonla birinci, Hindistan 99 milyon tonla ikincidir. Rusiya 3-cü, ardınca ABŞ, Kanada, Fransa və s. gəlir. Hətta 11-ci yerdə qardaş Türkiyə də var. Rusiya və Qazaxıstan öz başlarına hələ nələrin gələcəyini bilmədiyi üçün öz ehtiyatlarını artırırlar və buna görə məhdudiyyət tətbiq edirlər. Onların boşaltdığı bazarları tutmağa hazır olan ölkələr isə həmişə var. Digərləri özləri təklif gözlədiyi halda, Hindistan artıq Rusiyanın boşaltdığı bazarları tutmaq üçün dünyanın 30-a yaxın ölkəsinə özü müraciət edib. Məlumatlara görə burada Azərbaycan da var. Hindistan bu fürsətdən istifadə edərək, 99 mln tonluq istehsal həcmini 112 milyon tona çatdıracağını bildirir”.
Ekspert narahatedici məqamlara da toxunub:
"Bu, daşınma məsafəsinin uzaqlığı, logistik xərclərin artmasıdır. Eləcə də tələbin artmasına görə ixracatçıların ixrac rüsumlarını artırma riskləridir. Bütün bunlar məhsulun maya dəyərinə oturduğu üçün qiymətlərin artması qaçılmazdır. Deməli, problem taxıl problemi deyil, puldur. Həmişə satan olacaq, necə deyərlər "puluna minnət". Amma artan qiymətlər, ələxsus da, çörəyin qiymətinin artması sadə insanlar üçün ciddi sosial problemdir. Bu problemi yaranmağa qoymamaq üçün hazırda ən real effekt verəcək addım subsidiya mexanizminin genişləndirilməsi ola bilər. Dövlət bununla artan qiymətləri qarşılayar”.
Günay Rəsulqızı
Sfera.az
