Bahalaşan kənd təsərrüfatı mallarından nə qədər gəlir əldə edilib?
11:36 / 20.04.2022
1430
Bu il Azərbaycandan ixrac edilən kənd təsərrüfatı məhsullarının ixrac dəyərində 24 faizdən çox artım qeydə alınıb.
Sfera.az xəbər verir ki, ötən ilin birinci rübündə kənd təsərrüfatı mallarının ixrac dəyəri 170 milyon dollar olduğu halda, bu ilin eyni dövründə 210,7 milyon dollara yüksəlib. Müqayisədə bu il aqrar məhsullarının ixracından 40,7 milyon dollar çox gəlir əldə edildiyi görünür.
Kənd təsərrüfatı məhsulları arasında ixracda ən çox gəlir meyvədə olub. Meyvə ixracının dəyəri 80,5 milyon dollara yüksəlib. Bu ilin birinci rübündə təxminən 10 milyon dollar çox meyvə satılıb.
Meyvədən ixrac gəlirlərinin artması qiymətlərin yüksəlməsi ilə bağlıdır. Belə ki, ötən il 63,5 min ton meyvə satıldığı halda, bu il satılan meyvənin miqdarı 59,6 min tona düşüb. Lakin satılan meyvənin qiyməti yüksəldiyindən ixrac gəlirləri artıb.
Eyni hal pambıq ixracında da müşahidə edilib. Satılan pambığın miqdarının azalmasına baxmayaraq qiymətin yüksəlməsi hesabına əldə edilən gəlir 2,6 milyon dollar artaraq 72,2 milyon dollar olub.
Tərəvəz ixracında isə həm miqdar, həm də dəyər ifadəsində artım var. Bu səbəbdən tərəvəz ixracından gəlirimiz 63 faiz və ya 16,8 milyon dollar artaraq 43,6 milyon dollara yüksəlib.
Tərəvəz ixracının artması pomidor satışının kəskin artımı ilə bağlıdır. Birinci rübdə pomidor satışı 83 faiz artaraq 39 milyon dollara çatıb. Bu il pomidor satışı dəyər ifadəsində 17,6 milyon dollar artıb.
Meyvə, pambıq və tərəvəz kənd təsərrüfatı ixracında əsas mallar sayılır. Bu malların ümumi dəyəri 196,3 milyon dollar olmaqla cəmi ixracın 93,16 faizini təşkil edib.
Bu mallarla bərabər 5,2 milyon dollar dəyərində tütün xammalı, 3,6 milyon dollar dəyərində arpa, 3,5 milyon dollar dəyərində gön-dəri, 2 milyon dollar dəyərində heyvandarlıq məhsulları ixrac olunub. Adıçəkilən malların dəyərində də artım var.
Vasif
Sfera.az
