Vətən müharibəsinin üzə çıxardığı GERÇƏK: Erməni vandalizmi bütün çılpaqlığı ilə dünyaya göstərildi
Media
16:24 / 16.03.2022
891
44 günlük müharibədə şanlı ordumuzun uğurlu əks-hücum əməliyyatları və döyüş meydanındakı qəhrəmanlıqları nəticəsində torpaqlarımız işğaldan azad edilib. Müzəffər Ali Baş Komandanın rəhbərliyi ilə Azərbaycan Ordusunun şücaəti, yüksək döyüş qabiliyyəti və apardığı əməliyyatlar dünya hərb tarixinə qızıl hərflərlə yazılıb.
"Vətən müharibəsi”ndə qazanılmış tarixi qələbə həm də Ermənistan tərəfindən törədilmiş sülh və insanlıq əleyhinə cinayətlər, habelə müharibə cinayətlərini bir daha dünya ictimaiyyətinin diqqətinə çatdırıb.
Mövzu ilə bağlı Sfera.az-a açıqlama verən Diplomatiya Araşdırmaları Mərkəzinin sədri Samir Hümbətov deyib ki, ötən illər ərzində məqsədyönlü şəkildə inkişaf etdirilən, maddi-texniki bazası gücləndirilən, dünyanın ən güclü orduları sırasında olan şanlı Azərbaycan Ordusunun sarsıdıcı zərbələri nəticəsində ağır itkilər verən Ermənistan silahlı qüvvələrinin müqaviməti sındırıldı:
"44 günlük müharibə ərzində dünya bir daha erməni vandalizminin, erməni faşizminin şahidi oldu. Düşmən Azərbaycan xalqına nifrət hissi ilə yaşayıb, yaşayış binaları, məktəblər, xəstəxanalar, ictimai binalar, tarixi abidələr, qəbirlər və məscidlərin 99 faizini dağıdıb. Düşmənin törətdiyi hərbi cinayətlərin uçotu və dəymiş ziyanın hesablanması üçün araşdırma aparılır, beynəlxalq ekspertlər regiona dəvət edilir.
Ermənistan işğal edilmiş bütün ərazilərin onlarda qalmasını əks etdirən xəritələr dərc edib, işğal edilmiş ərazilərin adlarını dəyişib, xaricdən gəlmə erməniləri tarixi Azərbaycan əraziləri - Şuşada, Arazboyu yerləşən rayonlarda məskunlaşdırmaq istəyirdilər.
44 günlük müharibə vaxtı Azərbaycanın hərbi əməliyyatlar aparılmayan ərazisində ermənilərin hərbi cinayətləri nəticəsində 93 mülki şəxs həlak olub, 400-dən çox mülki şəxs yaralanıb, 3 mindən çox bina dağılıb.
Prezident İlham Əliyevin uzaqgörən siyasəti nəticəsində Qarabağ əsl cənnət məkanına çevrilir. Hazırda regionda bərpa prosesi davam etdirilir. Evlərindən didərgin salınan azərbaycanlıların BMT-nin Qaçqınlar üzrə Ali Komissarlığının nəzarəti altında yurdlarına geri dönməsi üçün işlər görülür”.
Turan Rzayev
Qeyd: Material Azərbaycan Respublikası Medianın İnkişafı Agentliyinin maliyyə dəstəyi ilə hazırlanıb.
Mövzu: Müzəffər Ali Baş Komandanın rəhbərliyi ilə 44 günlük "Vətən müharibəsi”ndə qazanılmış tarixi qələbə, Ermənistan tərəfindən törədilmiş sülh və insanlıq əleyhinə cinayətlər, habelə müharibə cinayətləri ilə bağlı həqiqətlərin dünya ictimaiyyətinə çatdırılması.
