Rus əsgərlərinin meyitləri burada gizlədilirmiş - "Sayları inanılmaz dərəcədə çox idi"
Media
13:44 / 14.03.2022
3535
Azad Avropa Radiosu (RFE) Rusiya-Ukrayna müharibəsi ilə bağlı mübahisəli fikir irəli sürüb.
Sfera.az bildirir ki, RFE müharibədə həlak olan rus əsgərlərinin Belarusdakı xəstəxanalarda saxlandığını iddia edib. Məlumata görə, bu xəstəxanalardakı həkimlər və digər səhiyyə işçiləri ilə məxfilik müqaviləsi imzalanıb və onlara gördüklərini deyəcəkləri halda, işlərini itirəcəkləri bildirilib. Azadlıq Radiosuna danışan hadisə şahidi bunları söyləyib:
"Cəsədlərin sayı inanılmaz dərəcədə çox idi. Mozıt stansiyasındakı insanlar qatara qoyulan meyitlərin sayına görə şoka düşmüşdülər”.
Rusiyanın ölənlərin sayını bir müddət gizli saxlamaq üçün bu üsula əl atdığı deyilib. Oxşar fikirlər Ukrayna hakimiyyət orqanları tərəfindən əvvəllər də səsləndirilmişdi, lakin bu iddiaları əsaslandırmaq üçün kifayət qədər sübut təqdim edilməmişdi. Qərb kəşfiyyatının məlumatına əsasən isə, Putin ordusu müqavimətin gücü qarşısında məəttəl qalıb.
Britaniya Kral Hərbi Hava Qüvvələrinin keçmiş rəisi Edvard Stringer "Sky News”a açıqlamasında "işğalçılar üçün işlərin çox pis getdiyini” söyləyib: "Əgər sizin üç generalınız öldürülübsə və cəmi 500 əsgər itirdiyinizi iddia edirsinizsə, bu real deyil”.
Qeyd edək ki, ABŞ kəşfiyyat agentliyinin Mərkəzi Kəşfiyyat İdarəsinin direktoru Burns keçən həftə Rusiyanın Ukraynadakı itkilərini açıqlamışdı. O, işğal cəhdinin 13-cü günündə Rusiyanın hərbi itkilərinin 2-4 min arasında olduğunu, lakin Ukraynaya görə, bu rəqəmin 10 mindən çox olduğunu vurğulamışdı.
Günay Rəsulqızı
Sfera.az
