Qızılın qramının qiyməti 63 dolları ötdü
Media
15:24 / 05.03.2022
1789
Qızılın qiymətində artım Rusiya-Ukrayna müharibəsinin başlamasından sonra bir qədər də güclənib.
Sfera.az xəbər verir ki, bu ilin yanvarın sonunda bir qramı 57,5 dollar olan xalis qızılın dəyəri bu gün 63,5 dollara çatıb. Ötən qısa müddətdə xalis qızılın qramı 6 dollar və ya 10,43 faiz artıb.
Xatırladaq ki, xalis qızılın qiyməti ən yüksək səviyyəyə 2020-ci ilin iyun-iyulunda yüksəlib. Həmin dövrdə qızılın bir qramı 65,2 dollar idi. Proqnozlaşdırılır ki, müharibə davam edərsə qızıla tələb artacaq və qiymət 12 il əvvəlki həddi də keçəcək.
Sanksiyalar səbəbindən Rusiya ABŞ dolları, avro və funt sterlinqlə əməliyyat apara bilmir. Buna görə də Rusiya həm ödənişlərini həyata keçirmək, həm də alacaqlarını əldə etmək üçün qızıldan daha çox istifadə edəcək. Bu vəziyyətdə qızıla tələb bir qədər də artacaq.
Qızılın bahalaşması Azərbaycan üçün əlverişlidir. Çünki Dövlət Neft Fondunun aktivlərinin bir hissəsi xalis qızılda saxlanılır. Hazırda Fondun 101,8 ton qızılı var. Bu qədər qızılın qiyməti bir ay əvvəl 5,84 milyard dollar olduğu halda, indi 6,5 milyard dollara yaxındır.
Vasif
Sfera.az
