Neftin bahalaşması Neft Fondunun gəlirlərini kəskin artırıb – RƏQƏMLƏR
Media
10:47 / 04.03.2022
1548
2022-ci ilin ilk 2 ayının məlumatına görə, Azərbaycanın "Azəri-Çıraq-Günəşli” (AÇG) və "Şahdəniz” üzrə gəlirləri kəskin şəkildə artıb.
Sfera.az Azərbaycan Respublikası Dövlət Neft Fonduna (ARDNF) istinadən xəbər verir ki, ilin əvvəlindən martın 1-nə kimi AÇG yatağı üzrə əldə olunan gəlirlər 1,307 milyard dollar təşkil edib.
Ötən ilin eyni dövrü ilə müqayisədə bu il AÇG üzrə gəlirlər 2,27 dəfədən çox artıb. 2021-ci ilin yanvar və fevral ayları üzrə cəmi gəlirlər 574,5 milyon dollar idi.
Bu il gəlirlərin kəskin artması neft qiymətlərinin xeyli yüksəlməsi ilə bağlıdır.
İlk 2 aydakı gəlirləri də nəzərə alınarsa, 2001-ci ildən etibarən ARDNF-in əldə etdiyi ümumi gəlirlərin məbləği 156,68 milyard dollara yüksəlib.
"Şahdəniz” yatağı üzrə qazın və kondensatın satışından əldə olunan iki aylıq gəlirlər isə 227,557 milyon dollar olub. Qaz yatağından əldə edilən gəlirlər əvvəlki ilin eyni dövrü ilə müqayisədə 65 dəfə artıb.
Yatağın işləndiyi 2007-ci ildən bəri ümumi gəlirlər 4,78 milyard dollara çatıb.
Vasif
