“Adam 4-5 il ərzində təhsil aldığı ölkənin dilini bilmirsə...” – Diplomlar niyə tanınmır?
16:36 / 15.02.2022
2030
Xaricdə təhsil alan bəzi
şəxslərin diplomlarının tanınmaması sosial şəbəkələrdə geniş müzakirəyə səbəb
olub. Diplomların tanınmamasına əsas kimi sərhəd keçmənin və baza dil bilgilərinin
yetərli olmaması göstərilir.
Mövzu ilə bağlı
Sfera.az-a açıqlama verən təhsil üzrə ekspert Elşən Qafarov deyib ki, xarici
ölkələrdə təhsil almağa gedən gənclərin bir qismi təəssüf ki, əziyyət çəkmədən
diplom almaq üçün gedənlərdir:
"Adətən diplomu
tanınmayan şəxslər bu kateqoriyadan olanlardır. Hansı ki, onlar təhsil
aldıqları ölkənin elementar dil biliyinə belə sahib olmur. Etiraf edək ki, tələbənin
4-5 il ərzində təhsil aldığı ölkənin dilini heç bilməməsi haqlı şübhələr
doğurur. Hesab edirəm ki, Təhsildə
Keyfiyyət Təminatı Agentliyinnin yaranması ilə bu məsələ də həllini tapacaq. Diplomu
tanınmayan vətəndaşlar bu qərarla razı deyilsə məsələni hüquqi müstəvidə yoluna
qoya bilərlər. Problem məhkəmə səviyyəsində də həll edilə bilər”.
Ekspert diplomların
pulla tanınması məsələsinə aydınlıq gətirib:
"Son günlər
xaricdə təhsil alan vətəndaşların diplomunun ölkədə tanınması üçün onlardan pul
istənilməsinə dair konkret faktlar yoxdur. Ola bilər ki, hansısa fırıldaqçılar
bu kimi tələblər irəli sürsün. Belə olan təqdirdə də vətəndaşların
hüquq-mühafizə orqanlarına müraciət etməsini məsləhət görürəm”.
