Dollar son bir həftədə ucuzlaşıb - SƏBƏB
14:00 / 13.01.2022
1229
Son günlər dolların ucuzlaşacağına dair yayılan məlumatlar beynəlxalq birjalarda Dollar İndeksinin düşməsinə səbəb olub. İndeks bir neçə gün ərzində 96,3 səviyyəsindən 94,7 səviyyəsinə qədər geriləyib.
Sfera.az bildirir ki, indeksin düşməsi dolların ucuzlaşması anlamına gəlir və bu dəyişiklik yüksək inflyasiyanın müşahidə edildiyi indiki dövrdə əlverişli deyil. Çünki dolların ucuzlaşması dünyada əmtəə qiymətlərinin yüksəlməsini bir qədər də gücləndirəcək və bunun nəticəsində ölkələrdə qiymət artımları davam edəcək.
Artıq bunun əlamətləri görünür. Dolların son həftə ərzində 2 faizə yaxın ucuzlaşmasının nəticəsində əksər əmtəələrin qiyməti yenidən yüksəlib.
Bəzi investorlar hesab edir ki, ABŞ-da xarici ticarət kəsirinin böyüməsi və qlobal iqtisadiyyatdakı bərpa dolları ucuzlaşdıracaq. Bunun nəticəsində ABŞ-dan kənarda olan aktivlərə tələbin güclənəcəyi ehtimalı var.
Lakin bəzi beynəlxalq ekspertlər indiki vəziyyətdə dolların ucuzlaşmasının heç kimin maraqlarına uyğun olmadığını düşünür. Xüsusən ABŞ-da yüksək inflyasiyanın qalması faizlərin artırılmasını və dolların bahalaşdırılmasını zəruri edir. Bunu əsas götürən ekspertlər dolların hələ bir müddət bahalı olacağını proqnozlaşdırır.
Dolların ucuzlaşması avro/dollar məzənnəsində də müşahidə edilir. Bir həftə ərzində avro 1,34 dollardan 1,47 dollara qədər bahalaşıb.
Eynilə Azərbaycanda da avronun manata qarşı olan dəyəri 1,92-dən 1,95-ə qədər yüksəlib.
Vasif
Sfera.az
