"Rusiya Xankəndindəki qondarma qurumu de-jure tanıya bilər, sonra isə..." - Azərbaycan üçün ən böyük TƏHLÜKƏ
13:27 / 28.12.2021
532
"Paşinyan və komandası onların sözünə baxmayan, daha çox Rusiya və Kremlin Ermənistandakı sözçülərinə bağlı olan qondarma rejimə pul xərcləmək istəmir. 2022-ci ildə Ermənistan büdcəsi 4 milyard dollar olacaq, bunun 300 milyon dollarını Arayikin dəstəsinə vermək, onların da bu pulu nəzarətsiz xərcləməsini istəmirlər”.
Sfera.az-ın məlumatına görə, bunu REAL partiyasının icraçı katibi, iqtisadçı Natiq Cəfərli deyib. O, bu vəziyyətin müsbət və mənfi tərəflərinin olduğunu vurğulayıb:
"Ermənistan Qarabağ prosesindən çəkilərək Azərbaycan və Türkiyə ilə normal münasibətlər qurmağı, Gürcüstan üzərindən dolayı Qərbə çıxışdansa, Türkiyə üzərindən birbaşa Qərbə çıxış əldə etməyi düşünür. İndi Ermənistan cəmiyyətində anti-Rusiya fikirləri çox güclüdür, Paşinyan və komandası özbaşına Qərbyönümlü deyil, onlar cəmiyyətdə olan münasibətin siyasi "tərcüməçisidirlər”. Yəni, rəsmi İrəvanın Xankəndi prosesindən çəkilmə istəyi Azərbaycanla daha tez anlaşma ortamı yarada bilər. Ermənistan Qarabağ məsələsini üzərindən artıb iqtisadi yüksəlişə köklənsə, cəmi 5 ildən sonra ÜDM və büdcəsini 2 dəfə artıra bilər” .
N.Cəfərli qeyd edib ki, Rusiya Xankəndi və ətrafında yaşayan erməni əsilli azərbaycanlıların Azərbaycana inteqrasiyasını istəmir:
"Ermənistan prosesdən çəkildikcə Xankəndi və ətrafında yaşayan erməni əsilli azərbaycanlılara daha çox yardım, iqtisadi fürsətlər, sosial layihələr təqdim etməklə onları özlərinə bağlayacaq. Bu gün Xankəndində olan qondarma qurumu de-fakto tanıdığı kimi, münasibətləri daha da dərinləşdirəcək, günün birində de-fakto tanıdığı rejimi de-jure tanıya, həmin qondarma qurumun geydirmə "parlamentinin” qərarı ilə orada bir ömür qalması ilə bağlı qərar çıxartdıra bilər. Bu, ən böyük təhlükədir. Biz tezliklə Xankəndi və ətrafında yaşayan erməni əsilli azərbaycanlıların ölkəyə inteqrasiyası ilə bağlı addım-addım planı açıqlamalıyıq”.
Günay Rəsulqızı
Sfera.az
