Əli Kərimli Əli İnsanovu “öldürdü” — 16 illik həsrətin izi ilə...

Özü cəhənnəmə, sevincdən mən birtəhər olmuşam. Böyük Ameeeeeerikadan danışan adamın son halı niyə belə oldu İlahi, 14 il həbsxanada sınmayan adamın yaşlı qamətini rəsmi kordorlarda sadəcə xoş qarşılamaqla necə əydilər? Lənətə gələsən, Əli müəllim! Bağışla, üç gündür ağlayıram, lənəti də sevincdən oxuyuram. "Dədə Qorqud " filmində deyildiyi kimi, mənim də sənə bir neçə məzlumcasına sualım var:

- Üç öpüb bir dişlədinmi, Əli müəllim? Axı özün də yazmısan ki, "Prezident Sarayında mənimlə qarşılaşan hər kəsin göstərdiyi hörmət və ehtirama görə ayrıca təşəkkürümü bildirirəm”. Kövrəltmə məni, Beyrək! 

- Beş atıb on tutdunmu, Əli müəllim? O biri Əli bəyin – AXCP sədrinin də arzu-istəklərini də yuxarı çatdırdınmı? 

- Nə böylərsən, nə ağlarsan, Əli müəllim? PA-da görüş keçirmək üçün o zırpılıqda partiya yaratmağa nə gərək var idi?

- Heç darıxmadınmı, qanlı köynəyimi görüb böyürmədinmi, qız? Əli müəllim, Əli Kərimlinin iştahı çox böyükdür, böyük Ameeeeerikadan da böyük... Özünü yorma. 

Əli müəllim, siz bu hakimiyyətlə əməkdaşlıq edən jurnalistləri "Prezidenti Aparatının mirzələri” adlandırırdın. 

PA ilə əməkdaşlığın mübarək, Əli müəllim. Uca Şirvinin ruhu sənə kömək olsun! Salam, Əli Mirzə! 

Və bir də səndən "Bəyin oğurlanması”ndakı kimi səhv bir sillə gözləyirəm. Hansı müxalifətçinin, naxçıvanlıların, yoxsa, Qərbi azərbaycanlıların, kimin üzünə vuracaqsan? Siyavuş Novruzov öz-özünü "dəfn” edib, mağazalarda mürəbbə satır, Hüseynbala Mirələmov təzə ocaq açıb hamı ziyarətə gedir, barmaqlarının, əlinin kəramətindən çox adam yararlanır. Səyavuş Aslana sillə vuran Muxtar Manıyev də yoxdur, onu tırkalayan pırpızbaş Vaqif Mustafayev də korrupsioner kimi işdən qovuldu. Həəəə, qalır bircə nümunə, onu da demirəm, uzağı yazda ortaya çıxacaq. 

Sağ ol, Əli Mirzə! "Vəfat”ın mübarək! 

 

(Demokrat.az)