“Davamiyyəti normal olmayan şagirdlərin qəbul imtahanlarına buraxılışı məhdudlaşdırılsın!” – TƏKLİF

 

Bunu Sfera.az-a açıqlamasında təhsil eksperti Kamran Əsədov deyib. Onun sözlərinə görə, qeyd edilən faktın əsas səbəbi məktəbin şagirdlərin vaxtını almasıdır. "Yəni ali məktəblərə qəbul olmaq istəyən şagirdlərə məktəb mane olur”, deyən müsahibimiz bildirib ki, Təhsil nazirliyi problemi aradan qaldırmaq üçün şagird yerdəyişmələrini elektron şəkildə həyata keçirdi:

"Daha çox şagirdlər 9-cu sinfə keçəndən sonra adlarını rayon, məcburi köçkün məktəblərinə yazdırırdılar, özləri isə orada olmurdular. Bu , ilk növbədə onların gələcəyinə mənfi təsir göstərir. Çünki şagirdlər məktəbə gedəndə tam şəkildə zəruri bilik və bacarıq almasalar da, sosiallaşırdılar. Amma hazırlıq kurslarında onlar yalnız bütün gün şəhərin bir tərəfindən digər tərəfinə gedirlər. Demək olar ki, sosiallaşmadan kənarda qalırlar”.

 

Ekspert qeyd edib ki, ikinci ciddi problem tədrisin gedişidir:

"Belə ki, 10-11-ci siniflər üçün dərs deyən müəllimlər auditoriyaya girən zaman görəndə ki, əslində 20-30 uşaq olmalı idisə, 4-5 şagird var və bunlar da əsasən oxumayan şagirdlərdir, bu, tədrisin keyfiyyətinə, müəllimin peşəkarlığına mənfi təsir edir. Hesab edirəm ki, bu problemlərin qarşısını almaq üçün öncə ali məktəblərə qəbul prosesini sadələşdirməliyik. Bu gün qəbul imtahanları məcburi olaraq, uşaqlarımızın məktəbdən kənar qalmasına gətirib çıxarır. Digər tərəfdən qaydalar da sərtləşməlidir. Yəni şagirdlər məktəbə gedəndə girişdə barmaq izi turniki quraşdırmaq lazımdır ki, onlar bunun vasitəsilə məktəbə daxil olsunlar və sonda davamiyyəti normal olmayan şagirdlərin qəbul imtahanlarına buraxılışı məhdudlaşdırılmalıdır. Biz yalnız bununla şagirdlərin dərsdə iştirakını təmin edə bilərik”.