“Regionların inkişafı paytaxtla paralellik təşkil etməlidir” – Deputat
İqtisadiyyat
13:01 / 03.12.2021
803
"Regionların sosial-iqtisadi inkişafının təşviq
edilməsi istiqamətində əsaslı işlər görülür. Xüsusilə 44 günlük müharibədən
sonra bu proses daha da sürətlənib. Artıq işğaldan azad edilən rayonunun Baş
Planı təsdiq olunub. Baş Plana əsasən, ən qısa zamanda işğalın fəsadları aradan
qaldırılmalı, regionların sosial-iqtisadi inkişafı təmin edilməlidir”.
Bu sözləri Sfera.az-a açıqlama verən Milli Məclisin
deputatı Vüqar Bayramov Regionların sosial-iqtisadi inkişafının təşviq edilməsi
istiqamətində görülən işlər haqda danışarkən deyib.
Onun sözlərinə görə, işğaldan azad edilən ərazilərə,
həmçinin digər regionlara yerli və xarici investisiyanın cəlb edilməsi
proqnozlaşdırılır:
"Bu baxımdan yalnız kənd təsərrüfatı məhsulları
deyil, sənaye məhsullarının istehsal edilməsi, onların bir qisminin daxildə
satışı, bir qisminin xaricə ixrac edilməsi nəzərdə tutulur. Məsələn, şərab məhsulları
keçmiş SSRİ-də xüsusi müqayisəli üstünlüyə malik idi. Hazırda regionlarımız böyük turizm
potensialına malikdir. Misal üçün Ağdam rayonu təbiəti və tarixi abidələri
turist cəlb etmək baxımından üstünlüyə malikdir. Ağdamda xüsusilə yay turizm
imkanları genişdir. İndiki halda regionların inkişafı gələcəkdə Şimal-Cənub nəqliyyat
dəhlizi ilə ixrac imkanını daha da genişləndirə biləcək”.
Deputat qeyd edib ki, ötən 14 il ərzində Azərbaycan
iqtisadiyyatına 231 milyard dollardan çox investisiya qoyulub ki, bunun yarısı
xarici sərmayədarların payına düşür:
"Xarici sərmayələrin böyük hissəsi regionlara
yönəldilib. Regionların sosial-iqtisadi inkişafı ilə bağlı dövlət
proqramlarının icrası zamanı infrastrukturun formalaşdırılması, bazara çıxış
imkanlarının genişləndirilməsi, eləcə də nəqliyyat və logistik xidmətlərin
inkişaf etdirilməsi imkanları yaradılır.
Sərmayələrin regionlara cəlb edilməsi
işsizliyin azalmasına, yoxsulluğun səviyyəsinin aşağı düşməsinə səbəb olur. Son
illərdə regionlarda biznes mühiti də inkişaf etdirilir. Hər bir sərmayə innovasiyaların yaranmasına səbəb
olur və bu da rayonların innovativ inkişafına xidmət edir”.
Turan Rzayev
Qeyd: Material Azərbaycan Respublikası Medianın
İnkişafı Agentliyinin maliyyə dəstəyi ilə hazırlanıb.
Mövzu: Regionların sosial-iqtisadi inkişafının
təşviq edilməsi
