Azərbaycan əsilli, britaniyalı müğənni Sami Yusifin dünən Türkiyədə "Barakah” adlı albomunun mətbuat konfransı keçirilib.

Publika.az Türkiyə mətbuatına istinadən xəbər verir ki, Azərbaycan əsilli müğənni keçirdiyi mətbuat konfransında bəzi insanların Türkiyənin güclü, inkişaf etmiş bir ölkə olmaması üçün məşğul olduğunu deyib. Alanyada konsert verməyə hazırlaşan sənətçi Türkiyədəki terror hadisələri haqqında fikirlərini belə ifadə edib: "Türkiyə çox inkişaf etmiş bir ölkədir. Bəzi insanlar Türkiyənin güclü, inkişaf etmiş bir ölkə olmasını istəmir. Sui-qəsd nəzəriyyəçisi deyiləm, onların kim olduqlarını da bilmirəm, amma bu istiqamətdə iş gedir, belə bir reallıq var. Lakin Allah hər şeydən, hər kəsdən böyükdür”.

"Mənim pulum, malım, mülküm var, buraya yalnız albom satmaq üçün deyil, eyni zamanda mühüm bir mesaj vermək üçün gəlmişəm. Ümid edirəm ki, bu albom varisləri olduğumuz ənənələrin, dəyələrin  və mədəniyyətin bir zikri, bir xatırlatması olar.  Və dua edirəm ki, keçmişdə nələrin baş verməsindən asılı olmayaraq, ona qulaq asanlar bu müqəddəs musiqidə bir rahatlıq və dinclik taparlar" , - deyə müğənni bildirib.

Sami Yusif Fransadakı terror aktı barədə də fikirlərini bölüşüb: O, Pakistanda, Türkiyədə və dünyanın bir çox yerində baş verən terror aktlarının onu çox kədərləndirdiyini deyib: "Günahsızların həyatına son qoyan terror hadisələrinin sona çatmasını arzulayırm”.