“30 illik işğal faktoru hədəflərdən yayındırmadı” - Azərbaycan dövlətçiliyi müasir mərhələdə...

Bu sözlər Azərbaycan Respublikasının prezidenti İlham Əliyevə məxsusdur. Dövlət başçısı bu fikirlərlə çoxəsrlik Azərbaycanın müasir mərhələdə müxtəlif sektorlarda mühüm nailiyyətlər əldə etdiyini və bunun fonunda işğal faktorunun kiçik qaldığını diqqətə çatdırıb. Dövlət müstəqilliyimizin bərpasının 30-cu ilində dövlətçilik ənənələrinin bu qədər möhkəm olması və 30 il davam etmiş separatçılığın, işğalın sonlanması təqdirəlayiqdir və beynəlxalq aləmdə suverenliyin özülüdür.

 

Dünyaya inteqrasiya olunduğumuz zamanda Azərbaycan milli-mənəvi dəyərləri, sənəti, mədəniyyəti, incəsənəti ilə sözün əsl mənasında heyrət doğura bilib. Bu milli-mənəvi dəyərlərin təməlində xalqın tarixi köklərini, mədəniyyətini, məişətini, sosial həyatını əks etdirən faktorlar dayanır. Belə bir tarixi irsin daşıyıcısı olan xalqın qürürla səhifələdiyi vərəqlər isə müstəqilliyimizin 30-cu ilində daha da zənginləşir, Azərbaycanın dünyaya töhfələr verən "abidə” olduğunu sübut edir. Prezident İlham Əliyev tərəfindən ardıcıl olaraq imzalanan sərəncamlarda sözügedən ifadə öz təsdiqini bir daha tapır.

Ölkəmizdə beynəlxalq tədbirlərin keçirilməsi, dinindən, irqindən asılı olmayaraq, saysız insanların Azərbaycana səfəri bu diyarın sivilizasiyaların birləşdiyi nöqtədə yerləşdiyinə əsaslanır və müxtəlif tədbirlərin Azərbaycanda təşkili ölkəmizin beynəlxalq nüfuzunu daha da artırır.

Müasir dövrdə elm və təhsilin rolu, təsir dairəsi artdıqca bütün dünyanın inkişaf etmiş dövlətləri bu sahəyə xüsusi diqqət yetirirlər. Belə bir şəraitdə iqtisadi cəhətdən inkişaf edən Azərbaycan Respublikası da elm və təhsilə hərtərəfli qayğı göstərir.

Hazırda Azərbaycanda elm və təhsilin birgə inkişaf konsepsiyasının reallaşdırılması, kadr hazırlığını genişləndirmək, ali məktəblərdə elmin inkişafına şərait yaratmağın önə çəkilməsi məsələsinə diqqət yetirilir. Son illər müstəqil Azərbaycan Respublikası üçün yeni kadrların hazırlanması daha da aktuallaşıb, nəzəri, eləcə də praktik baxımdan mühüm  əhəmiyyət kəsb edir. Bu məqsədlə dövlət başçısı İlham Əliyev dünyanın ən inkişaf etmiş ölkələrinə gəncləri təhsil almağa göndərərək, müasir dövrün yeni milli elm və təhsil elitasını yetişdirir. Həmin gənclər bu gün Azərbaycanın müxtəlif sahələrində çalışan yüksək ixtisaslı kadrlardır.

 

Qeyd: Material Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır.

Mövzu: Dövlət müstəqilliyimizin bərpasının 30-cu ili – Azərbaycan dövlətçiliyi müasir mərhələdə;