Jelatinli konfetləri yəqin ki, dünyanın bütün uşaqları sevir. Buna bir səbəb onların dadlı olmasıdırsa, digər səbəb müxtəlif və rəngarəng formalara malik olmasıdır.

Nəhəng və müxtəlif rəngli qurdlar və ya miniatür ayılar- bütün bunlar məşhur çeynənilən konfetlərdir. Yeri gəlmişkən, valideynlər tez-tez uşaqların bu konfetlərdən istifadələrinə məhdudiyyət tətbiq edir. Onların fikirlərinə əsasən, bu şiriniyyatın tərkibində həddindən çox şəkər var. Lakin həqiqətdə onlar heç bir təhlükə daşımır.

Lakin "ürək bulanması”na səbəb olacaq bəzi nüanslar mövcuddur. Əgər konfetlərin tərkibinə diqqətlə nəzər salsanız orada sirop, şəkər və konsentratlar arasında jelatini görə bilərsiniz. Bəs jelatinin nədən hazırlandığı sizə bəllidirmi? 

Bu gün sizlərə məhz bu barədə məlumat vermək istəyirik.

Jelatin təəssüf ki, ağacda bitmir. Bu dadsız, sarımtıl maddə heyvanların dərisinin, sümüklərinin, qığırdaqlarının uzun müddət qaynadılması yolu ilə əldə edilir. Yəni məna etibarı ilə ət istehsalı tullantılarından hazırlanır: donuz və mal ətinin emalından sonra qalan sümüklərdən, dırnaqlardan, dərilərdən, buynuzlardan.

Jelatin ya birbaşa ət kombinatında hazırlanır, ya da istehsalçılar tullantıları sallaqxanada toplayırlar. Heyvanların hissələri sterilizə edilir və uzun müddət 140 dərəcədə qaynadılır, bundan sonra kütlə xırdalanır və ağ toz alınana qədər qurudulur. Bu toza istənilən ətir və rəng vermək mümkündür.

Jelatin tam təhlükəsizlik zəmanətinə malikdir, belə ki, təbii inqrediyentlərdən hazırlanır. Ondan asanlıqla istənilən jele və oxşar qidaları hazırlaya bilərsiniz. Qeyd edək ki, jelatin yalnız konfetlərin tərkibində deyil, eyni zamanda vitaminlər, dərmanlar, kolbasalar və konservlərin, meyvə qəlyanaltılarının tərkibində də yer alır. Bu vegetarianlar üçün əsil "tələdir”.

Jelatin istehsalı ətrafdan kifayət qədər qanlı və iyrənc görünə bilər, lakin etiraf etmək lazımdır ki, bu məhsulun tərkibində yağ, karbohidrat tamamilə yoxdur və xolesterinə malik deyil. Əksinə onun tərkibində 18 amin turşusu yer alır ki, onlar sümüklərin, bağların və vətərlərin bərpasına yardım edir. Ümumən, bunun faydalı və ya zərərli olmasından asılı olmayaraq qəbul etdiyiniz qidanın tərkibini bilmək yaxşı haldır.