Azərbaycan Qaribaşvilinin təklifinə NƏ CAVAB VERƏCƏK?

Maraqlıdır, Azərbaycan və Ermənistan Gürcüstanı görüş yeri kimi seçə bilərmi?

Bununla bağlı Sfera.az-a açıqlama verən politoloq Əlimusa İbrahimov xatırladıb ki, Gürcüstan hələ 44 günlük müharibə baş verməmişdən əvvəl - Azərbaycan ərazisi erməni işğalında olan dövrlərdə də münaqişənin həll olunması üçün öz yardımını təklif edirdi:

"Təbi ki, bu yardım iki ölkə arasında vasitəçi olmaqdan başqa heç nəyi nəzərdə tuta bilməzdi. Çünki Gürcüstan iki qonşu ölkə arasında münaqişədə heç kimin tərəfini saxlaya bilməzdi. Bunu Azərbaycanda daha yaxşı başa düşürdülər və məhz buna görə də ordumuz başda Ali Baş Komandan olmaqla, heç bir dövlətə ciddi arxalanmadan torpaqları işğaldan azad etdi. 

Müharibə bitdi, torpaqlarımızın çox böyük hissəsi işğaldan azad olundu. Amma Azərbaycanla Ermənistan arasında həll ediləsi çoxlu məsələlər var ki, bunları da danışıqlar masası arxasına gətirmək lazımdır. Bu istiqamətdə danışıqlar gedir. Sadəcə Cənubi Qafqazda münaqişənin tam aradan qalxmasını istəməyən xarici qüvvələr var və bu qüvvələr münaqişəli vəziyyətin uzunmüddət saxlanmasına cəhd edirlər. Paşinyanın Türkiyə və Azərbaycanla birbaşa danışıqlar aparmağa istiqamətlənən bəyanatları da məhz sülh prosesinə əngəl olan maneələrin aradan qaldırılmasına xidmət edir və bu istiqamətdə Gürcüstanın Baş Naziri İrakli Qaribaşvilinin platforma təklif etməsi qiymətləndirilməlidir”.

Müsahibimiz qeyd edib ki, Avropanın da istəyi Azərbaycan-Ermənistan arasında və o cümlədən, Türkiyə -Ermənistan arasında birbaşa danışıqların başlamasıdır:

"Amma Ermənistanın belə danışıqların keçirilməsinə can atmasına baxmayaraq, ölkə daxilində bu prosesin başlanmasına qarşı çıxan və xaricdən maliyyələşdirilən ciddi qüvvələr var. Ermənistan Baş Naziri Nikol Paşinyan bu qüvvələrin müqavimətini qıraraq Azərbaycan və Türkiyənin haqlı tələblərini yerinə yetirə bilsə, bu, Cənubi Qafqaz üçün sülh naminə atılmış ən dəyərli addım olardı”.